रत्न मन्दिर र हिमागृहको जग्गा ३० वर्षका लागि लिजमा दिने प्रक्रियामा आपत्ति

पाेखरा । नेपाल ट्रस्टको स्वामित्वमा रहेका पोखराका रत्न मन्दिर, हिमागृह र बाराहीघाटको जग्गा ३० वर्षका लागि लिजमा दिने सूचनाप्रति पोखराका मेयर तथा सम्पदा संरक्षणकर्मीहरूले आपत्ति जनाएका छन्। सर्वोच्च अदालतको आदेश, फेवातालको मापदण्ड र प्रचलित कानुनी व्यवस्थासँग मेल नखाने गरी टेन्डर आह्वान गरिएको उनीहरूको दाबी छ।

प्राकृतिक, ऐतिहासिक र सांस्कृतिक महत्त्व बोकेको क्षेत्रमा व्यावसायिक संरचना निर्माण अघि बढाउन नहुने उनीहरूले बताएका छन्। स्थानीय सरोकारवालासँग छलफल नगरी प्रक्रिया अघि बढाइएको भन्दै संरक्षणकर्मीहरूले टेन्डर रोक्न माग गरेका छन्। मेयरले पनि कानुनी तथा प्राविधिक जटिलता रहेको जग्गामा लगानी गर्नुअघि व्यवसायीहरू सचेत हुनुपर्ने बताएका छन्।

फेवाताल र आसपासका ऐतिहासिक सम्पदा पोखराको साझा पहिचान भएकाले तिनको संरक्षणलाई प्राथमिकता दिनुपर्ने सरोकारवालाहरूको माग छ।