भारत, लाओस र पानामाका राजदूतहरूले राष्ट्रपतिसमक्ष ओहोदाको प्रमाणपत्र पेस गरे

काठमाडौँ — भारत, लाओस र पानामाका नवनियुक्त राजदूतहरूले राष्ट्रपति रामचन्द्र पौडेलसमक्ष आ–आफ्नो ओहोदाको प्रमाणपत्र पेस गरेका छन्। शुक्रबार राष्ट्रपति भवनमा आयोजित छुट्टाछुट्टै विशेष समारोहमा भारतका राजदूत सुधाकर दलेला, लाओसका राजदूत भिथाया जायाभोङ र पानामाका राजदूत अलोन्सो मिगेलले प्रमाणपत्र पेस गरेका हुन्। दलेला नेपालका लागि भारतका आवासीय राजदूत हुन्। लाओसका जायाभोङ र पानामाका मिगेल भने गैरआवासीय राजदूत हुन्।
प्रमाणपत्र पेस गर्नुअघि नवनियुक्त राजदूतहरूलाई लाजिम्पाटदेखि राष्ट्रपति भवनसम्म रिसल्लासहितको बग्गीमा लगिएको थियो। समारोहमा नेपाल सरकारका उच्चपदस्थ अधिकारीहरूको समेत उपस्थिति थियो।