तिहारमा वीरगञ्जको व्यापार सुस्त, विगतको रौनक हराउँदै

वीरगञ्ज । कुनै समय चाडपर्वको आगमनसँगै किनमेल गर्ने ग्राहकको भीडले भरिभराउ हुने वीरगञ्जको बजारमा यस वर्ष तिहारको रौनक देखिएको छैन। औद्योगिक तथा व्यापारिक नगरीका रूपमा परिचित वीरगञ्जमा तिहारजस्तो मुख्य चाडपर्वमा समेत व्यापार व्यवसाय सुस्ताएको छ। मुलुकमा छाएको आर्थिक मन्दी, बढ्दो महँगी र सर्वसाधारणको घट्दो क्रयशक्तिको प्रत्यक्ष असर बजारमा देखिएको छ। तिहारमा विद्युतीय सामग्री, लत्ताकपडा, सजावटका सामान तथा दैनिक उपभोग्य वस्तुको बिक्री बढ्ने अपेक्षा गरिन्छ।

विगतका वर्षमा टेलिभिजन, फ्रिजलगायतका इलेक्ट्रोनिक्स सामग्रीको उल्लेख्य कारोबार हुने वीरगञ्जमा पछिल्ला वर्षदेखि नै व्यापार घट्दै गएको व्यवसायीहरूको अनुभव छ। यस वर्ष त झन् ग्राहकको आगमन र खरिद दुवै घटेको उनीहरूको भनाइ छ। व्यापारमा आएको मन्दीसँगै वीरगञ्जको मुख्य सडक विस्तारका क्रममा भौतिक संरचना भत्काइएपछि सडक किनारमा व्यवसाय गर्दै आएका व्यापारी थप प्रभावित भएको वीरगञ्जका व्यवसायी आलोक अग्रवालले बताए। धनतेरस जस्तो चाडपर्वमा लाखौँको सामान विक्री गर्ने गरेकोमा हाल भने ५ लाखको समेत बिक्री हुन नसकेको गुनासो गरे।

यस्तै, मुख्य सडकबाट विस्थापित कतिपय व्यवसायीले गल्लीभित्रका सडकमा महँगो भाडा तिरेर पसल सञ्चालन गर्नुपरेको गुनासो गरेका छन्। एकातिर ग्राहकको अभाव र अर्कोतर्फ बढ्दो घरभाडा तथा सञ्चालन खर्चले व्यवसाय धान्नै कठिन भएको उनीहरूको भनाइ छ। चाडपर्वको समयमा व्यापार बढ्ने र वर्षभरिको कारोबारलाई गति दिने अपेक्षामा रहेका व्यवसायीहरू निराश छन्। सडकमा मानिसहरूको सामान्य चहलपहल देखिए पनि पसलहरूमा ग्राहकको उपस्थिति न्यून छ। वीरगञ्जलाई कुनै समय ‘कुबेरको नगरी’का रूपमा चिनिन्थ्यो। तर पछिल्ला वर्षहरूमा चाडपर्वको समयमा समेत बजारमा उत्साह घट्दै गएको छ भने यहाँको व्यापारिक गतिविधिमा समेत ह्रास आएको छ.