‘सिक्किम आइडल’ले विश्वभरका नेपालीभाषी प्रतिभा जोड्दै बिर्तामोडमा नोभेम्बर ३० मा अडिसन

झापा । भारतको सिक्किममा आयोजना हुँदै आएको गायन प्रतियोगिता ‘सिक्किम आइडल’ले यसपटक अन्तर्राष्ट्रिय रूपमा प्रतिस्पर्धी सहभागी गराउने भएको छ। ‘सिक्किम आइडल इन्टरनेसनल सिजन–३’ मार्फत नेपालसहित विश्वभरका नेपालीभाषी गायन प्रतिभालाई एउटै मञ्चमा जोड्न लागिएको आयोजकले जनाएको छ। शुक्रबार बिर्तामोडमा आयोजित पत्रकार सम्मेलनमा आयोजकले प्रतियोगिताको तयारी र अडिसन तालिकाबारे जानकारी दिएको हो। नेपालका बिर्तामोड र काठमाडौंमा नोभेम्बर ३० मा प्रत्यक्ष अडिसन हुनेछ।

हाम्रो वार्ता टेलिभिजन प्रस्तुतकर्ता रहेको प्रतियोगिताबारे संरक्षक तथा सिक्किम कला, संस्कृति तथा सम्पदा बोर्डका अध्यक्ष सञ्जय दिलपाली राई, प्रमुख कार्यक्रम सञ्चालन अधिकृत डा. मनोज राई र कार्यक्रम इन्चार्ज दिवश राईले जानकारी दिएका थिए। संरक्षक राईले विश्वभर छरिएका नेपालीभाषी प्रतिभालाई आफ्नो गायन क्षमता प्रस्तुत गर्ने अवसर दिन प्रतियोगितालाई अन्तर्राष्ट्रिय स्वरूप दिइएको बताए। यसका लागि सिक्किमका मुख्यमन्त्री प्रेमसिंह तामाङ र उनका राजनीतिक सचिव ज्याकब खालिङको पहल रहेको आयोजकको भनाइ छ।

डा. राईका अनुसार प्रतियोगितामा १५ वर्ष पूरा भएका इच्छुक व्यक्तिले भाग लिन सक्नेछन्। सहभागिताका लागि उमेरको माथिल्लो सीमा तोकिएको छैन। बिर्तामोड, काठमाडौं र देहरादुनमा नोभेम्बर ३० मा अडिसन हुनेछ। गुवाहाटी, सिलिगुडी, दार्जिलिङ र कालिम्पोङमा डिसेम्बर ३ तथा सिक्किमका विभिन्न स्थानमा डिसेम्बर ६ देखि ८ सम्म अडिसन सञ्चालन गरिनेछ। प्रत्यक्ष अडिसनमा उपस्थित हुन नसक्नेले भिडियोमार्फत पनि आवेदन दिन सक्नेछन्। आयोजकका अनुसार नोभेम्बर २५ सम्म बढीमा दुई मिनेटको गायन भिडियो ह्वाट्सएप नम्बर +९१ ६२९६५२९८१३ वा +९१ ९४७५३७१००२ मा पठाउन सकिनेछ।

भिडियोमा ब्याकिङ ट्र्याक प्रयोग गर्न पाइने छैन। तर, एउटा वाद्ययन्त्रको साथमा गीत प्रस्तुत गर्न सकिने व्यवस्था छ। प्रतियोगिताको विजेताले १० लाख भारतीय रुपैयाँ पुरस्कार पाउनेछन्। दोस्रो हुनेले पाँच लाख र तेस्रो हुनेले तीन लाख भारतीय रुपैयाँ प्राप्त गर्नेछन्। प्रतियोगिताको पहिलो संस्करण जेत्सेन डोना लामा र दोस्रो संस्करण ओजस्वी गुरुङले जितेका थिए। पत्रकार सम्मेलनको सहजीकरण सञ्चारकर्मी सुनिता तामाङले गरेकी थिइन्।