अमेरिकी उपराष्ट्रपति जेडी भान्सले इजरायललाई अमेरिकी सहयोगी र बलियो साझेदार देशको रूपमा वर्णन गरेका छन्। उनले इरानसँगको सङ्घर्षको अन्त्य अमेरिकी जनताको हितमा हुने दाबी गरेका छन्। इरानी संसदका सभामुख मोहम्मद बगर गालिबाफले आगामी दिनमा पाकिस्तान भ्रमण गर्ने सम्भावना रहेको चर्चा गरिएको छ।
उपराष्ट्रपति भान्सले इजरायललाई अमेरिकाको बलियो साझेदार र सहयोगी देशको रूपमा उल्लेख गर्दै साथी राष्ट्रहरूबीच मतभेद हुनसक्ने भएपनि सम्बन्ध मजबुत रहेको बताएका छन्। फक्स न्युजसँगको अन्तर्वार्तामा उनले इजरायली प्रधानमन्त्री बेन्जामिन नेतान्याहुले ब्लेयर हाउसमा भएको बैठकमा आफ्नो विरोध नगरेको स्पष्ट पारेका छन्। यसअघि केही रिपोर्टहरूमा नेतान्याहुले भान्सको विरोध गरेको बताइएको थियो।
भान्सले इरान विषयमा उल्लेख गर्दै त्यहाँ वार्ताको पक्षमा एक समूह रहेको दाबी गरेका छन्। उनले अर्को कट्टरपन्थी समूह भने युद्ध निरन्तरता दिन चाहने अवस्थामा रहेको बताए। उनले भनेका छन्, ‘इरानसँगको टकराव र सङ्घर्षका क्रममा चुनौतीहरू आउँछन्, तर यसको अन्तिम परिणाम अमेरिकी जनताको हितमा हुनेछ।’
यस्तै, केही रिपोर्टहरूमा इरानी संसदका सभामुख मोहम्मद बगर गालिबाफले निकट भविष्यमा पाकिस्तान भ्रमण गर्ने बताइएको छ। तर, अहिलेसम्म इरानको आधिकारिक निकायबाट यी खबरहरूमा कुनै प्रतिक्रिया आएको छैन।
