एक दर्जन पुरुष तथा महिला राष्ट्रिय फुटबल खेलाडीहरूले मङ्गलवार ‘नेपाल फुटबल खेलाडी सङ्घ’मार्फत् नेपाली फुटबल जोगाउन सामाजिक सञ्जालमा गरेको गुहारको भिडियो आङ सिरिङ्ङ हुने खालको छ। नेपाली फुटबल जोगाउन अपील गर्दै #SaveNepaliFootball सहित गरिएको उक्त पोस्टमा फिफा, एएफसी, एनएससी र नेपाल सरकारलाई सम्बोधन गरिएको छ। विश्व फुटबल महासङ्घ फिफाले नेपाली फुटबललाई निलम्बन गरेको झन्डै दुई महिना पुग्न लाग्दा खेलाडीहरू, प्रशिक्षकहरू र प्रशासकहरू अहिले नेपाली फुटबल जोगाउन एन्फा निलम्बन फुकुवा गराउने प्रयासमा लागेका छन्। नेपाल फुटबल खेलाडी सङ्घका अध्यक्ष विक्रम लामा भन्छन्, “खेलाडीहरू मर्कामा छन्। जिम्मेवार पक्षहरू मौन छन्। त्यसैले हामीले दबावको कार्यक्रम सुरु गरेका हौँ। यसलाई जारी राख्छौँ।”
अहिलेको अवस्थामा नेपाली फुटबललाई राहत दिने उपाय के हुन सक्छ त? हामीले त्यसबारे चर्चा गरेका छौँ।
१) सरकारले हस्तक्षेप बन्द गरेमा
नेपाल सरकारले हस्तक्षेप बन्द गरेमा एन्फाको निलम्बन तत्कालै फुकुवा हुन सक्छ। फिफाले निलम्बनको कारण ‘तेस्रो पक्षको हस्तक्षेप’ हो भनी ठहर गरेको छ। यदि सरकारले पूर्ववत् स्थितिमा एन्फालाई निर्वाचन गर्न अनुमति दिएमा निलम्बन फुकुवा हुन सक्छ। फिफाले निलम्बन फुकुवाका लागि यही सर्त राखेको छ। “कुनै शर्त बिना २५ मार्च २०२६ को राखेपको निर्णय पूर्ण रूपमा फिर्ता लिने र हालको एन्फा कार्यसमिति पुनःस्थापन गर्ने। साथै एन्फालाई यसको विधान र नियमहरूअनुसार पहिले नै सुरु भइसकेको निर्वाचन प्रक्रिया सकेसम्म चाँडो सम्पन्न गर्न अनुमति दिने,” फिफाले भनेको छ।
२) एन्फाले सरकार र साधारण सभाको निर्णय मानेमा
एन्फाले साधारण सभाको निर्णय पालना गर्दै अघि बढेमा निलम्बन फुकुवा हुने फुटबल विश्लेषकहरू बताउँछन्। फुटबल मिसन टुगेदरका प्रमुख कार्यकारी अधिकारी मधुसूदन उपाध्याय भन्छन्, “एन्फाका पदाधिकारीहरूले बैठक बसेर साधारण सभाको निर्णय स्विकार्दै अघि बढ्ने निर्णय गरी त्यसको जानकारी फिफालाई दिइएमा निलम्बन फुकुवा हुन सक्छ।”
३) सर्वस्वीकार्य तदर्थ समिति गठन भएमा
मातेस्रो विकल्प हो– नेपाल सरकार, फिफा र एन्फा तीनै पक्षको सहमतिमा एउटा तदर्थ समिति गठन गरि नयाँ निर्वाचनको जिम्मेवारी दिनु। त्यस समिति मा फिफा र एन्फा, सरकारी पक्ष र अन्य निष्पक्ष प्रतिनिधिहरू रहनेछन्। यसले तय गरिएको समयसीमामा नयाँ निर्वाचन गर्नेछ।
सरकारका शिक्षा तथा खेलकुद मन्त्री सस्मित पोखरेलले पत्रकारहरूसँग कुरा गर्दै फिफासँग निरन्तर सम्पर्कमा रहेको तर नतिजा नआउन्जेल विषय सार्वजनिक गर्न नमिल्ने बताएका थिए। उनले भने, “फिफासँग निरन्तर संवाद भइरहेको छ। कुरा सकारात्मक रूपमा अगाडि बढिरहेको छ।”
निलम्बन फुकुवाका लागि जे उपाय अवलम्बन गरे पनि तीनै पक्षबीच संवाद हुनु अत्यन्तै महत्वपूर्ण छ। अहिले समाधानका लागि दुई पक्ष मात्र क्रियाशील देखिएका छन्। एन्फाका पदाधिकारीहरू आफू निलम्बनमा परेको हुँदा संघर्ष नगर्ने गरी पछि हटेको देखिन्छ। सरकारले फिफासँग वार्ता गरिरहेको देखिन्छ भने फिफा आफ्नो अडानमा टिका छ। सबै पक्ष आफ्ना अडानमा अडिग रहँदा एन्फा निलम्बन अझै लामो समयसम्म कायम रहने छ। खेलाडीहरू भने आफुहरूले कष्ट भोगिरहेको बताएका छन्।
