शिक्षा तथा खेलकुद मन्त्री सस्मित पोखरेलले २०औं एसियाली खेलकुदको बन्द प्रशिक्षणमा रहेका खेलाडीलाई उत्कृष्ट प्रदर्शनका लागि निरन्तर प्रयास गर्न आग्रह गर्नुभएको छ। मन्त्री पोखरेलले खेल क्षेत्रको विकासका लागि दीर्घकालीन लगानी आवश्यक रहेको भन्दै यसै वर्ष १०औं राष्ट्रिय खेलकुद प्रतियोगिता हुने जानकारी दिनुभयो।
मन्त्री पोखरेलले गौशाला क्षेत्रस्थित पशुपति बुटिकमा पुगेर बन्द प्रशिक्षणमा रहेका खेलाडीहरूसँग अन्तरक्रिया गर्नुभयो। एसियाडको लागि बन्द प्रशिक्षणमा रहेका खेलाडीहरूलाई पशुपति र सिनामंगलस्थित रोयल बुटिकमा बसाइँ गरिएको छ। उहाँले खेलाडीहरूको तयारी अवस्था र तिनले भोगिरहेका समस्या पनि बुझ्नुभयो।
मन्त्री पोखरेलले शिक्षा र खेलकुद दुवै क्षेत्रमा तत्काल परिणाम होइन, दीर्घकालीन लगानी आवश्यक पर्नेमा जोड दिनुभयो। उनले खेल क्षेत्र र खेलाडीका समस्याहरू समाधानमा आफू प्रतिबद्ध रहेको जानकारी दिनुभयो। टेनिस खेलाडी प्रदीप खड्काले राष्ट्रिय टोलीको बन्द प्रशिक्षणमा सहभागी हुन पाउनु गर्वको विषय भएको उल्लेख गर्दै, खेलकुद मन्त्रीको उपस्थितिलाई प्रशंसा गरे।
एसियाली खेलकुदकी रजत पदक विजेता एरिका गुरुङले ‘मिसन–२०२६’ को तयारीले खेलाडीलाई धेरै फाइदा पुगेको बताउनुभयो। भलिबलका मुख्य प्रशिक्षक जगदीश भट्टले उत्कृष्ट प्रशिक्षकबाट दक्ष खेलाडी उत्पादन सम्भव भएको बताए। कार्यक्रममा राष्ट्रिय खेलकुद परिषद्का उपाध्यक्ष विशाल श्रेष्ठ, शिक्षा तथा खेलकुद मन्त्रीका प्रमुख सल्लाहकार सिद्धी व्यञ्जनकार, सल्लाहकार राजु सिंह र राखेप कार्यकारी समितिका सदस्य सिक्का सुवाल श्रेष्ठ पनि उपस्थित थिए।
सम्बन्धित खबर
