साउदी अरबको राजधानी रियादस्थित एउटा सोफा कारखानामा लागेको भीषण आगलागीमा १६ जना बङ्गलादेशी नागरिकको मृत्यु भएको छ। बङ्गलादेशको विदेश मन्त्रालयले घटनाको पुष्टि गर्दै मृतकका परिवारलाई आवश्यक सहयोग र कानुनी प्रक्रिया अघि बढाउन साउदी अधिकारीसँग समन्वय गरिरहेको जनाएको छ। रियादस्थित बङ्गलादेशी दूतावासले घटनास्थलमा टोली परिचालन गरेर मृतकको पहिचान गर्ने तथा शव हस्तान्तरणसम्बन्धी कानुनी प्रक्रिया प्राथमिकताका साथ अघि बढाइरहेको छ।
सोफा कारखानामा आइतबार आगलागी भएको थियो। घटनामा ज्यान गुमाउने सबै बङ्गलादेशी नागरिक रहेको बङ्गलादेशको विदेश मन्त्रालयले सोमबार पुष्टि गरेको हो। मन्त्रालयले विज्ञप्ति जारी गर्दै मृतकप्रति गहिरो दुःख व्यक्त गरेको छ साथै परिवारजनप्रति हार्दिक समवेदना पनि व्यक्त गरेको छ। कठिन परिस्थितिमा मृतकका परिवारसँग सरकार साथमा रहेको र आवश्यक सहयोग उपलब्ध गराउने प्रतिबद्धता मन्त्रालयले जनाएको छ।
घटनाको खबर पाए लगत्तै रियादस्थित बङ्गलादेशी दूतावासका अधिकारी घटनास्थल पुगेका थिए। दूतावासले साउदी अधिकारीसँग समन्वय गरी आगलागीमा ज्यान गुमाउनेहरूको पहिचान पुष्टि गर्ने तथा शव हस्तान्तरणसम्बन्धी आवश्यक कानुनी प्रक्रिया अघि बढाइरहेको जनाएको छ। दूतावासले सामाजिक सञ्जालमार्फत जारी गरेको विज्ञप्तिमा रियादको मुसा सनैया क्षेत्रमा भएको आगलागीमा प्रवासी बङ्गलादेशी नागरिकको मृत्यु भएकोमा दुःख व्यक्त गरेको छ।
बङ्गलादेशको विदेश मन्त्रालयले घटनाको अवस्थालाई नजिकबाट निगरानी गरिरहेको जनाएको छ। मन्त्रालयका अनुसार मृतकको पहिचान तथा अन्य कानुनी प्रक्रिया पूरा गर्न सम्बन्धित साउदी अधिकारीसँग निरन्तर समन्वय भइरहेको छ। साउदी अरबमा ठूलो संख्यामा बङ्गलादेशी नागरिक रोजगारीका लागि कार्यरत छन्। रियादमा भएको पछिल्लो घटनाले प्रवासी श्रमिकको कार्यस्थल सुरक्षा तथा आपत्कालीन अवस्थामा उनीहरूको संरक्षणको विषय पुनः चर्चामा ल्याएको छ।
