टाइफून डल्फिनका कारण चीनमा १० लाख भन्दा बढी मानिस सुरक्षित स्थानमा सरे

चिनियाँ अधिकारीहरूले टाइफून डल्फिनका कारण देशको आर्थिक राजधानी शाङ्घाई र पूर्वी चीनका विभिन्न क्षेत्रहरूबाट १० लाखभन्दा बढी मानिसलाई सुरक्षित स्थानमा सारिएको बताएका छन्। उक्त टाइफूनका कारण व्यापक वर्षा परेको छ र क्षेत्रको यातायात व्यवस्था प्रभावित भएको छ। सोमबार मात्र शाङ्घाईमा करिब १ हजार उडानहरू रद्द गरिएको थियो।

अधिकारीहरूले डल्फिनलाई अहिले ‘ट्रपिकल स्टर्म’को स्तरमा घटाएका छन्, तर आँधी उत्तरतर्फ बढ्दो क्रममा रहेकाले बुधबारसम्म मुसलधारे वर्षा, गम्भीर बाढी र पहिरोको जोखिम रहेको चेतावनी जारी गरिएको छ। मौसम पूर्वानुमानकर्ताहरूका अनुसार आइतबार साँझ करिब पाँच बजेर तीस मिनेटमा जेजियाङ प्रान्तको युहानमा जमिनमा डल्फिन टीकिँदा यसको अधिकतम वेग १५० किलोमिटर प्रतिघण्टा थियो।

सरकारले मानिसहरूलाई बाहिर ननिस्कन आह्वान गरेको छ। डिज्नील्यान्ड, लेगोल्यान्डजस्ता पर्यटक आकर्षण स्थलहरू बन्द छन्। प्रभावित क्षेत्रका भवनका भुइँतलामा रहेका व्यापारी तथा व्यवसायमा बाढीले असर पुर्‍याएको छ। जेजियाङ प्रान्तका एक नौ वर्षे बालक हराएको समाचार विभिन्न सञ्चारमाध्यमले दिएका छन्।

चिनियाँ अधिकारीहरूले अहिलेसम्म कुनै हताहतको विवरण सार्वजनिक गरेका छैनन्। जेजियाङको राजधानी हाङ्जोमा तीव्र हावाहुरी र बाढीका कारण सुरक्षित ठाउँ खोज्दै गरेका चालकहरूका लागि सबै सार्वजनिक स्थलमा पार्किङ शुल्क माफ गरिएको छ। फुजियान तटीय प्रान्तमा समुद्री अधिकारीहरूले दर्जनौँ यात्रुवाहक फेरी सेवाहरू स्थगित गरेका छन्।