स्कटल्यान्ड र नेदरल्यान्ड्सले आईसीसीको नयाँ प्रावधानप्रति असन्तुष्टि व्यक्त गर्दै संयुक्त वक्तव्य जारी गरे

समाचार सारांश क्रिकेट स्कटल्यान्ड र नेदरल्यान्ड्सले आईसीसीद्वारा पुरुष ५० ओभर विश्वकप छनोट प्रक्रिया र संरचनामा गरिएको परिवर्तनप्रति गम्भीर असन्तुष्टि व्यक्त गरेका छन्। उनीहरूले विश्वकप सुरु हुन १८ महिना बाँकी रहँदा गरिएको यस्तो निर्णयले एसोसिएट राष्ट्रको क्रिकेट विकासमा प्रत्यक्ष नकारात्मक असर पर्ने बताएका छन्। पर्याप्त परामर्शविना निर्णय गरिएको भन्दै दुवैले आईसीसीलाई तत्काल पुनः संवादमा आउन र प्रक्रिया स्पष्ट गर्न आग्रह गरेका छन्। २५ साउन, काठमाडौं। क्रिकेट स्कटल्यान्ड र नेदरल्यान्ड्सको रोयल डच क्रिकेट बोर्ड (केएनसीबी) ले आईसीसीले पुरुष ५० ओभर विश्वकपको छनोट प्रक्रिया र प्रतियोगिता संरचनामा गरेको समसामयिक परिवर्तनप्रति असन्तुष्टि व्यक्त गरेका छन्। दुवै टोलीले विश्वकपको प्रारम्भमा १८ महिना मात्र बाँकी रहँदा आईसीसीले छनोट संरचनामा महत्वपूर्ण परिवर्तन गरेको भन्दै यसले एसोसिएट राष्ट्रहरूको क्रिकेट विकासमा नकारात्मक प्रभाव पार्ने जनाएको छ। संयुक्त वक्तव्यमा, उनीहरूले पछिल्ला वर्षहरूमा एसोसिएट राष्ट्रहरूले विश्व क्रिकेट विस्तारका लागि गरेका प्रयासहरू नयाँ संरचनाले कमजोर बनाउन सक्ने बताएका छन्। उनीहरूको मान्यता अनुसार, उदाउँदो राष्ट्रहरूलाई विश्वकपजस्ता ठूला प्रतियोगितामा अवसर कम दिनु क्रिकेटको विश्वव्यापी विकासको उद्देश्यसँग मेल खाँदैन। पर्याप्त छलफलबिना गरियो निर्णय स्कटल्यान्ड र केएनसीबीले छनोट संरचनामा जस्तो महत्वपूर्ण विषयमा एसोसिएट सदस्य राष्ट्रहरूसँग उचित परामर्श नलिएर निर्णय गरिएको आरोप लगाएका छन्। उनीहरूले यस्ता निर्णय पारदर्शी प्रक्रिया, छलफल र सदस्य राष्ट्रहरूसँग प्रभावकारी संवादपछि मात्रै गरिनुपर्ने बताएका छन्। विश्वकप छनोट चक्र सुरु भइसकेको अवस्थामै छिटो संरचना परिवर्तन गर्दा खेलाडी र संघहरूको तयारी, आर्थिक योजना तथा सञ्चालनमा अनिश्चितता बढ्ने चेतावनी उनीहरूले दिएका छन्। उनीहरूले भनेका छन्, विश्वकपमा प्रतिस्पर्धा गर्ने लक्ष्यसहित एसोसिएट राष्ट्रका खेलाडी र संघले वर्षौं तयारी र लगानी गर्ने भएकाले छनोट प्रक्रियामा अचानक परिवर्तनले उनीहरूमा प्रत्यक्ष असर गर्नेछ। आईसीसीसँग दुईपटक छलफल गरे तर जवाफ आउन सकेन परिवर्तन सार्वजनिक भएपछि क्रिकेट स्कटल्यान्ड, केएनसीबी र अन्य एसोसिएट सदस्यहरूले आईसीसीसँग दुईपटक छलफल गरेको वक्तव्यमा उल्लेख छ। उनीहरूले परिवर्तनबारे आधिकारिक लिखित जानकारी, प्रक्रियामा स्पष्टता र भविष्यका निर्णय प्रक्रियाहरूलाई थप व्यवस्थित बनाउन सकारात्मक कदम चाल्न अनुरोध गरेका थिए। साथै, एसोसिएट सदस्यहरूलाई फुल मेम्बर राष्ट्रसँग हुने द्विपक्षीय योजना बैठकहरूमा सहभागी गराउन पनि आग्रह गरिएको थियो। तर दोस्रो बैठक भइसकेको दुई हप्ताभन्दा बढी समय बितिसक्दा आईसीसीबाट कुनै थप प्रतिक्रिया नआएको उनीहरूको भनाइ छ। दुवै संघले यसलाई निराशाजनक र आफ्ना उठाएका विषयको महत्वलाई बेवास्ता गरिएको संकेतको रूपमा लिएका छन्। विश्वकपले एसोसिएट क्रिकेटमा लगानी बढाउने अवसर दिन्छ स्कटल्यान्ड र नेदरल्यान्ड्सले विश्वकपमा छनौट हुनु एसोसिएट राष्ट्रहरूका लागि खेलमैदान बाहेक पनि महत्वपूर्ण अवसर रहेको बताएका छन्। विश्वकप सहभागिताले खेलाडीलाई प्रेरित गर्दै लगानी, प्रायोजन र सरकारी सहयोग आकर्षित गर्न र नयाँ समर्थकहरू जोड्न मद्दत गर्ने उनीहरूको भनाइ छ। आईसीसीका ठूला प्रतियोगिताहरूमा एसोसिएट राष्ट्रहरूले फुल मेम्बरहरूलाई चुनौती दिएर र कहिलेकाहीं पराजित गरेर विश्व क्रिकेटको अविस्मरणीय क्षणहरू सिर्जना गरेका छन्। त्यसैले, उनीहरूले सफलता मैदानमा प्रदर्शनका आधारमा निर्णय हुनुपर्ने जोड दिएका छन्। आईसीसीलाई पुनः संवादमा आउन आग्रह क्रिकेट स्कटल्यान्ड र केएनसीबीले आईसीसीलाई पुनः एसोसिएट सदस्यहरूसँग संवादमा आउन र उनीहरूले उठाएका मागहरूमा छलफल गर्न आग्रह गरेका छन्। विश्वकप छनोट प्रक्रिया स्थिर, स्पष्ट र पूर्वानुमानयोग्य हुनुपर्ने भन्दै, सबै सदस्य राष्ट्रलाई प्रतिस्पर्धा, विकास र सफलता हासिल गर्ने समान र वास्तविक अवसर प्रदान गर्नुपर्नेमा उनीहरूले जोड दिएका छन्। दुवै संघले आगामी पुरुष विश्वकप प्रतिस्पर्धात्मक र सफल बनाउन आईसीसीसँग सहकार्य गर्न तयार रहेको र क्रिकेटको दीर्घकालीन विकासका लागि सबै सदस्यको अर्थपूर्ण सहभागिता र निष्पक्ष अवसर आवश्यक रहेको निष्कर्ष गरेका छन्।