एचजेनएबीएल २०२६ मा केभीसी हाउण्ड्सले लगातार छैटौं जीत हासिल गर्दै सोलोलाई १०२-६९ ले पराजित गरेको छ। गोल्डेनगेटले कीर्तिपुरलाई ८७-६२ को अन्तरले हराउँदै अजय कुशवाहलाई म्यान अफ दि म्याच घोषणा गरेको छ। प्रतियोगितामा ८ टोलीले प्रतिस्पर्धा गरिरहेका छन् र शीर्ष चार टोली प्लेअफमा प्रवेश गर्नेछन्। १३ चैत, काठमाडौं।
हिमालयन जाभा नेशनल बास्केटबल लिग (एचजेनएबीएल) २०२६ मा केभीसी हाउण्ड्सले विजयी यात्रा निरन्तरता दिँदै लगातार छैटौं जीत हासिल गरेको छ। त्रिपुरेश्वरस्थित दशरथ रंगशालाको कभर्डहलमा शुक्रबार साँझ सम्पन्न खेलमा हाउण्ड्सले सोलो बास्केटबल क्लबलाई १०२-६९ को फराकिलो अन्तरले पराजित गरेको छ। सुरुका तीन खेलमा पराजित भएपछि हाउण्ड्सले उत्कृष्ट प्रदर्शन गर्दै लगातार खेल जित्दै आएको छ।
पहिलो क्वाटर सोलोले २५-२२ ले आफ्नो पक्षमा पारेको थियो। तर हाउण्ड्सले दोस्रो क्वाटरमा खेल नियन्त्रण गर्दै २८-१९ को स्कोर बनाउँदै हाफटाइमसम्म ५०-४४ को अग्रता बनायो। हाउण्ड्सले तेस्रो क्वाटर २९-१४ र चौथो क्वाटर २६-११ ले आफ्नो पक्षमा पार्दै फराकिलो जीत हासिल गरेको हो। ९ खेलपछि १५ अंक जोड्दै हाउण्ड्स चौथो स्थानमा रहेको छ। हाउण्ड्सका उजेन नोर्बु गुरुङलाई खेलको म्यान अफ दि म्याच घोषित गरिएको छ।
सोलोको यो सातौं हार हो भने सोलो ९ खेलबाट ११ अंकसहित पाँचौं स्थानमा रहेको छ। बिहीबार राति सम्पन्न खेलमा गोल्डेनगेट बास्केटबल क्लबले कीर्तिपुरलाई ८७-६२ ले पराजित गरेको छ। गोल्डेनगेटका अजय कुशवाहलाई म्यान अफ दि म्याच घोषणा गरिएको छ। नेपाल बास्केटबल संघ (नेबा) को आयोजनामा भइरहेको दोस्रो संस्करणको एचजेएनबीएलमा ८ टोलीले प्रतिस्पर्धा गरिरहेका छन्।
डबल राउण्ड रोविन आधारमा हुने लिगमा कुल ५६ खेल हुनेछन्। लिग चरणपछि शीर्ष चार टोली प्लेअफमा प्रवेश गर्नेछन्। प्लेअफ अन्तर्गत लिगमा पहिलो र दोस्रो स्थानमा रहने टोलीबीच पहिलो क्वालिफायर खेल हुनेछ भने तेस्रो र चौथो स्थानमा रहेका टोलीबीच एलिमिनेटर खेल हुनेछ। पहिलो क्वालिफायरमा पराजित टोली र एलिमिनेटर विजेताबीच दोस्रो क्वालिफायर हुनेछ। पहिलो र दोस्रो क्वालिफायर विजेताबीच फाइनल खेल हुनेछ। प्रतियोगिताको विजेताले नगद ४ लाख, उपविजेताले २ लाख र तेस्रो स्थानमा रहनेले १ लाख प्राप्त गर्नेछन्। त्यस्तै प्रतियोगिताभर उत्कृष्ट प्रदर्शन गर्ने खेलाडीलाई मोस्ट भ्यालुएबल प्लेअर (एमभीपी) घोषित गरिनेछ र उनलाई पनि आकर्षक पुरस्कार प्रदान गरिनेछ।
