कोलकाताको मिर्जा गालिब स्ट्रिटस्थित होटलमा बुधबार बिहान करिब २ बजे आगलागी हुँदा कम्तीमा ९ जनाको मृत्यु भएको छ भने ६ जना गम्भीर घाइते भएका छन्। मृतकमध्ये ९ जना बंगलादेशी नागरिक रहेको प्रारम्भिक जानकारी छ, र उनीहरू उपचारका लागि कोलकाता आएका बताइएको छ। प्रहरी र दमकलको टोलीले आगो नियन्त्रणमा लिएर अनुसन्धान थालेको छ, तर आगलागीको कारण अहिलेसम्म खुल्न सकेको छैन।
भारतको कोलकातामा बुधबार बिहान एक होटलमा भीषण आगलागी हुँदा ठूलो मानवीय क्षति भएको छ। आगलागीमा कम्तीमा ९ जनाको मृत्यु भएको छ भने ६ जना गम्भीर घाइते भएका छन्। भारतीय मिडियाहरुका अनुसार आगलागी कोलकाताको मिर्जा गालिब स्ट्रिटस्थित एक होटलमा आज बिहान करिब २ बजे भएको हो। अधिकांश मानिसहरू सुतिरहेको बेलामा होटलमा आगो लागेको थियो।
आगलागीमा मृत्यु भएका ९ जना बंगलादेशी नागरिक रहेको र उनीहरू उपचारका लागि कोलकाता आएका प्रारम्भिक जानकारी छ। आगोबाट उठेको बाक्लो धुवाँ र लप्का निस्किएपछि होटल परिसरमा भगदड मच्चिएको थियो। आगो केही समयभित्र तीव्र गतिमा फैलिएको थियो। घटनाको जानकारी पाए लगत्तै प्रहरी र दमकलका धेरै गाडी घटनास्थलमा पुगेका थिए। त्यसपछि उद्धार तथा राहत कार्य सुरु गरिएको थियो।
बाक्लो धुवाँका कारण दमकलकर्मीलाई आगो नियन्त्रणमा लिन कठिनाइ भएको थियो। धुवाँका कारण होटलका माथिल्ला तलामा पुग्नसमेत समस्या परेको थियो। लामो प्रयासपछि दमकल टोलीले आगो पूर्ण रूपमा नियन्त्रणमा लिएको छ। आगलागीको कारण भने अहिलेसम्म खुल्न सकेको छैन। प्रहरीले फरेन्सिक टोलीको सहयोगमा घटनाको अनुसन्धान सुरु गरेको छ। यसअघि सोमबार पनि भारतको पश्चिम बंगालस्थित बीरभूम जिल्लामा चारतले होटलमा आगलागी हुँदा ७ जनाको मृत्यु भएको थियो।
