आसिफ शेखले १६१ रन बनाएर र अर्जुन कुमालसँगको २२० रनको ओपनिङ साझेदारीले नेपाललाई एसीसी प्रिमियर कपअघिको अभ्यास खेलमा मलेसियामाथि जीत दिलाएको छ। मलेसियाले ४८.२ ओभरमा २३२ रन बनाएकोमा कप्तान सन्दीप लामिछानेले १० ओभरमा ३६ रन खर्चिएर ४ विकेट लिए। नेपालले वर्षापश्चात ४८ ओभरमा २२८ रनको लक्ष्य पाएको थियो र २८ ओभरमै एक विकेट गुमाएर लक्ष्य पूरा गर्यो। ९ भदौ, काठमाडौं । ओपनर आसिफ शेखको शतकयुक्त १६१ रन र अर्जुन कुमालसँगको दोहोरो शतकीय साझेदारीको सहयोगमा नेपालले एसीसी प्रिमियर कपअघि खेलिएको अभ्यास खेलमा मलेसियालाई पराजित गरेको छ। मलेसियाले २३३ रनको लक्ष्य पछ्याउँदै वर्षा कारण खेल रोकिएपछि ४८ ओभरमा २२८ रन लक्ष्य तय भएको थियो। नेपालले उक्त लक्ष्य २८ ओभरमा एक विकेट गुमाएर पूरा गर्यो। आसिफ शेखले ८५ बलमा १६१ रन बनाए, जसमा १२ चौका र १२ छक्का समावेश छन्। आसिफ र अर्जुन कुमालले मिलेर २२० रनको ओपनिङ साझेदारी गरे। अर्जुन कुमाल अन्त्यसम्म नटआउट रहे र ६१ रन बनाए। पहिले ब्याटिङ गरेको मलेसियाले ४८.२ ओभरमा सम्पूर्ण विकेट गुमाएर २३२ रन बनायो। मलेसियाका लागि मुहम्मद स्याहादात रामलीले सबैभन्दा धेरै ६१ रन बनाए। सैफुल्लाह मलिकले ४५, साइद अजिजले ४० र विरानदीप सिंहले ३९ रन बनाए। नेपालका कप्तान सन्दीप लामिछानेले १० ओभरमा ३६ रन दिएर ४ विकेट लिए। करण केसीले २ विकेट लिए भने ललित राजवंशी र दीपेन्द्रसिंह ऐरीले १-१ विकेट लिए। नेपालले मलेसिया भ्रमणअघि भारतमा कर्नाटकसंग भएको दुई अभ्यास खेल जितेको थियो।
