समाचार सारांश समीक्षा सम्पन्न। टाइम्स बास्केटबल क्लबले एचजेएनबीएल २०२६ मा लगातार नवौं जित हात पारेको छ। टाइम्सले प्लेबक्स एरेनालाई १० खेलबाट १९ अंकसहित पराजित गरेको छ। नेपाल बास्केटबल संघको आयोजनामा आठ टिमले प्रतिस्पर्धा गरिरहेका छन्। १४ चैत, काठमाडौं।
हिमालयन जाभा नेशनल बास्केटबल लिग (एचजेएनबीएल) २०२६ मा टाइम्स बास्केटबल क्लबले लगातार नवौं जित हासिल गरेको छ। त्रिपुरेश्वरस्थित दशरथ रंगशाला कभर्डहलमा शनिबार भएको खेलमा टाइम्सले प्लेबक्स एरेनालाई ७६-५४ अंकले पराजित गरेको हो। टाइम्सले पहिलो क्वाटर २०-१८ र दोस्रो क्वाटर २०-१० ले आफ्नो पक्षमा पार्दै हाफ टाइमसम्म ४०-२८ को अग्रता बनाएको थियो। तेस्रो क्वाटरमा टाइम्सले २०-१३ र चौथो क्वाटरमा १६-१३ को अग्रता बनाउँदै जित सुनिश्चित गरेको थियो। टाइम्सले लगातार नौं खेल जितेर १० खेलबाट १९ अंकसहित शीर्ष स्थानमा पुगेको छ। नवौं हारपछि प्लेबक्सको १० खेलबाट ११ अंक भएको छ।
टाइम्सका मनिष केसी म्यान अफ दि म्याच घोषित भएका छन्, उनले सर्वाधिक १९ अंक स्कोर गरे। त्यसैगरी, शुक्रबार राति भएको खेलमा त्रिभुवन आर्मी क्लबले प्लेबक्स एरेनालाई १०३-७४ ले पराजित गरेको थियो। आर्मीका लागि सिमोन गुरुङले सर्वाधिक ३५ अंक स्कोर गरे। ९ खेलमा आठौं जित हात पारेको आर्मी १७ अंकसहित दोस्रो स्थानमा छ। गुरुङ म्यान अफ दि म्याच घोषित भएका थिए। नेपाल बास्केटबल संघ (नेबा) को आयोजनामा भइरहेको दोस्रो संस्करणको एचजेएनबीएलमा ८ टिमले प्रतिस्पर्धा गरिरहेका छन्।
डबल राउण्ड रोविन प्रणालीमा आधारित यो लिगमा कुल ५६ खेल हुनेछन्। लिग चरणपछि शीर्ष चार टिमले प्लेअफमा प्रवेश गर्नेछन्। प्लेअफ अन्तर्गत लिगमा पहिलो र दोस्रो स्थानमा हुने टिमबीच पहिलो क्वालिफायर हुनेछ भने तेस्रो र चौथो स्थानमा हुने टिमबीच एलिमिनेटर खेल हुनेछ। पहिलो क्वालिफायरमा पराजित टोली र एलिमिनेटर विजेताबीच दोस्रो क्वालिफायर हुनेछ। पहिलो र दोस्रो क्वालिफायर विजेताबीच फाइनल खेल हुनेछ। प्रतियोगिताको विजेताले नगद ४ लाख प्राप्त गर्नेछन् भने उपविजेताले २ लाख र तेस्रो हुनेले १ लाख हात पार्नेछन्। प्रतियोगिताभर उत्कृष्ट प्रदर्शन गर्ने खेलाडीलाई मोस्ट भ्यालुएबल प्लेअर (एमभीपी) घोषित गरिने र यसलाई पनि आकर्षक पुरस्कार प्रदान गरिने नेबाले जनाएको छ।
