नेपाल भलिबल लिगले भदौ १९ गते पहिलो दिनको टिकट बिक्रीबाट प्राप्त सबै रकम प्रधानमन्त्री दैवी प्रकोप उद्धार कोषमा हस्तान्तरण गर्ने भएको छ। एनभीएलले भोटेकोशी बाढीपीडितहरूको उद्धार तथा राहतमा खेलकुदमार्फत सहयोग गर्ने निर्णय गरेको जनाएको छ। लिगका टिकटहरू खल्ती बाई आईएमईमार्फत अनलाइन तथा त्रिपुरेश्वरस्थित राष्ट्रिय खेलकुद परिषद्को कभर्डहलबाट खरिद गर्न सकिनेछ।
१५ भदौ, काठमाडौं। नेपाल भलिबल लिग (एनभीएल) ले भोटेकोशी बाढीपीडितहरूको सहयोगका लागि लिगको पहिलो दिनको टिकट बिक्रीबाट संकलित सम्पूर्ण रकम प्रधानमन्त्री दैवी प्रकोप उद्धार कोषमा जम्मा गर्ने भएको जानकारी दिएका छन्। एनभीएलले भदौ १९ गते हुने पहिलो दिनका खेलहरूको टिकट बिक्रीबाट प्राप्त सम्पूर्ण रकम बाढीपीडितहरूको उद्धार तथा राहतका लागि कोषमा उपलब्ध गराउने घोषणा गरेको छ।
एनभीएलका टिकटहरू खल्ती बाई आईएमईमार्फत अनलाइन तथा त्रिपुरेश्वरस्थित राष्ट्रिय खेलकुद परिषद्को कभर्डहलबाट खरिद गर्न सकिन्छ। खल्ती बाई आईएमईमार्फत भदौ १४ गतेदेखि टिकट बुकिङ खुला गरिएको छ। भोटेकोशी क्षेत्रमा आएको बाढीका कारण ठूलो जनधनको क्षति भएपछि एनभीएलले खेलकुदमार्फत प्रभावित परिवारहरूलाई सहयोग गर्ने निर्णय गरेको छ। नेपाल भलिबल लिगको खेल तालिका पनि सार्वजनिक भइसकेको छ।
