भोटेकोशी-त्रिशूली बाढीको सातौँ दिनमा उद्धारकार्यलाई सो नदीका दायाँबायाँ रहेका जलविद्युत् आयोजनाका सुरुङहरूमा केन्द्रित गरिएको छ, आकस्मिक सेवासम्बन्धी निकायका अधिकारीहरूले जनाएका छन्। बुधबार आएको बाढीसँगै ११ वटा जलविद्युत् आयोजनाका करिब ९०० कर्मचारी सम्पर्कविहीन भएका छन्। तीमध्ये कतिपय सुरुङभित्र फसेका हुन सक्ने आशंका गरिएको छ। “हाम्रो अधिकांश प्रयास अहिले त्यहीँ केन्द्रित छ। उक्त अभियानको नेतृत्व नेपाली सेनाले गरिरहेको छ,” गृह मन्त्रालयअन्तर्गत राष्ट्रिय आपत्कालीन कार्यसञ्चालन केन्द्र (एनईओसी) का प्रमुख फणीन्द्रप्रसाद पौडेलले भने। ‘एनईओसी’ गृह मन्त्रालयअन्तर्गत विपद् व्यवस्थापनसम्बन्धी प्रमुख निकाय हो। “पहिलो प्राथमिकता जीवित भेटिने सम्भावना हुनेहरूलाई खोज्नु हो। उद्धारपछि विभिन्न क्याम्पमा राखिएका मान्छेहरूमा देखिएका स्वास्थ्य समस्याको जानकारी पनि प्राप्त भइरहेको छ। साथै शव व्यवस्थापन व राहतलगायत कार्यहरूमा पनि केन्द्रित रहेका छौँ।” उनका अनुसार यी कार्यका लागि सुरक्षा निकायका २१ हजार जनशक्ति परिचालित छन्।
आलोचनासुरुङहरूमा उद्धारकार्यले अपेक्षित गति लिन नसकेको भन्दै सम्पर्कविहीन व्यक्तिका परिवारले असन्तुष्टि जनाउन थालेका छन्। “मेरो बुवाको अवस्था थाहा छैन, तर मैले आशा त्यागेको छैन,” अपर त्रिशूली वन ए आयोजनाको सुरुङमा काम गर्ने आफ्ना बुवाको खोजीमा धुन्चे पुगेका बाग्लुङको तमानखोलाका राजन गोतामेले बताउनुभएको छ। उहाँका बुवा बुधबारदेखि सम्पर्कविहीन छन्। “उहाँ सीफा (सुरुङ खन्ने मशीन) अपरेटर हुनुहुन्थ्यो। बाँचेर बाहिर निस्केका उहाँका साथीहरूले उहाँ भित्रै हुनुहुन्छ र जीवित हुने सम्भावना रहेको बताइरहेका छन्।” नेपाल इन्जिनियर्स एसोसिएसनका अध्यक्ष सुवासचन्द्र बरालले टनेलमा फसेकाको उद्धारमा सरकारले पर्याप्त तीव्रता देखाउन नसकेको बताए। “काम गर्ने स्तर त्यति देखिएन। हाम्रा धेरै साथीहरू त्यहाँ छन् भनी भान छ। उद्धारको गति देख्दा चिन्ता लागेको छ।”
