१८ भदौ, काभ्रेपलाञ्चोक। पाँचखाल नगरपालिका प्रमुख महेश खरेलले बाढीपहिरो प्रभावित परिवारहरूलाई राहत स्वरूप व्यक्तिगत रूपमा २० लाख रुपैयाँ सहयोग गरेको घोषणा गरेका छन्। खरेलले उक्त रकम प्रधानमन्त्री दैवी प्रकोप राहत कोषमा हस्तान्तरण गरेको जानकारी दिएका छन्। ‘निर्वाचनका समयमा मैले आफ्नो १० वर्षको सम्पूर्ण तलब जनताको सेवामा समर्पित गर्ने वाचा गरेका थिएँ,’ उनले बताए, ‘त्यही प्रतिबद्धता अनुसार बाढीपहिरोबाट प्रभावित परिवारहरूको राहतका लागि २० लाख रुपैयाँ सहयोग गरेको हुँ।’
नगर प्रमुख खरेलले बाँकी तलब पनि जनसेवामा लगाउने योजना रहेको बताएका छन्। उनले जनताबाट पाएको जिम्मेवारीको सानो अंश जनताको दुखमा फर्काउने प्रयासका रुपमा सहयोग गरेको उल्लेख गरेका छन्। पाँचखाल नगरपालिकाले यसअघि नै भोटेकोसी बाढीपीडितलाई १० लाख रुपैयाँ सहायता गर्ने निर्णय गरिसकेको छ। नगरपालिकाका अनुसार सबै जनप्रतिनिधिले १ हप्ताको तलब बराबरको रकम राहत कोषमा दिने निर्णय पनि गरेको छ। साथै, बाढीमा परेर ज्यान गुमाउने वा बेपत्ता हुने पाँचखाल नगरका नागरिकहरूको परिवारलाई जनही १ लाख रुपैयाँ राहत दिने निर्णय पनि भएको छ।
