रुस-युक्रेन युद्ध अन्त्य गर्न अमेरिकी वार्ताकारहरू मस्को र किभ प्रस्थान

२० भदौ, काठमाडौं । अमेरिकी राष्ट्रपति डोनाल्ड ट्रम्पका विशेष दूत स्टिभ विटकफ र ज्वाइँ जारेड कुशनर रुस र युक्रेन भ्रमण गर्न लागेका छन्। उनीहरूले रुस–युक्रेन युद्ध समाप्त गर्न प्रयासका रूपमा भ्रमणमा जाने योजना बनाएका हुन्। पत्रकारको प्रश्नमा राष्ट्रपति ट्रम्पले ती प्रतिनिधिहरू युद्ध अन्त्य गर्ने प्रस्ताव लिएर जान लागेको बताएका छन्। ट्रम्पले यसका लागि अमेरिकाले ठोस प्रस्ताव राखेको जनाए तापनि विस्तृत विवरण सार्वजनिक गरेका छैनन्।

युक्रेनका राष्ट्रपति भोलोदिमिर जेलेन्स्कीले पनि विटकफ र कुशनरको भ्रमण पुष्टि गरेका छन्। योजना अनुसार ती प्रतिनिधिहरू शनिबार मस्को पुगेर रुसी राष्ट्रपति भ्लादिमिर पुटिनसँग भेटवार्ता गर्नेछन् भने आइतबार किभ पुगेर जेलेन्स्कीसँग वार्ता गर्ने कार्यक्रम छ। विटकफ र कुशनर राष्ट्रपति ट्रम्पको तर्फबाट रुस–युक्रेन शान्ति वार्ता अघि बढाउने प्रयासमा सक्रिय छन्। उनीहरूले यसअघि पनि युरोपमा पटक–पटक वार्ता गरिसकेका छन्, यद्यपि युद्धरत दुवै पक्षबीच गहिरो मतभेद अझै कायम छ। रुसले युक्रेनलाई थप भूभाग छोड्न माग गरिरहेको छ भने युक्रेनले उक्त माग अस्वीकार गर्दै आएको छ।