किकबक्सिङमा लगातार विजेता बने अविरल घिमिरे

जापानको नागोयास्थित करिया हलमा सम्पन्न किकबक्सिङ–५९ अन्तर्राष्ट्रिय प्रतियोगितामा अविरल घिमिरेले फ्रान्सका माथन चोइनार्डलाई नकआउट गर्दै ७० केजी तौल वर्गमा च्याम्पियन बने। अविरलले २९ अन्तर्राष्ट्रिय प्रतिस्पर्धामा यो आफ्नो २१ औं जित हात पार्न सफल भएका छन्, जसमा २० जित नकआउट मार्फत हासिल गरेका छन्। २१ भदौ, काठमाडौं।

नेपाली युवा बक्सर अविरल घिमिरेले किकबक्सिङ–५९ अन्तर्राष्ट्रिय प्रतियोगितामा उत्कृष्ट सफलता हासिल गरेका छन्। जापानको नागोयास्थित करिया हलमा सम्पन्न उक्त प्रतियोगितामा पुरुष ७० केजी तौल समूहमा “हिमालयन चितुवा” उपनामले परिचित अविरलले फ्रान्सका माथन चोइनार्डलाई नकआउट मार्फत पराजित गर्दै च्याम्पियन बन्न सफल भएका हुन्। माथन २०२५ का वर्तमान च्याम्पियन हुन्।

करियरमा २९ अन्तर्राष्ट्रिय प्रतियोगितामा सहभागी भएका अविरलले यो आफ्नो २१ औं जित दर्ता गरेका छन्। तीमध्ये २० खेल नकआउट मार्फत जितेका छन्। उनी चन्द्रागिरी नगरपालिका–१२, गुर्जुधाराका बासिन्दा हुन्। जितपछि अविरलले हालै रसुवामा आएको भोटेकोशी बाढीबाट भएको जनधन क्षतिको विषयमा दुःख व्यक्त गर्दै पीडितहरूलाई सहयोग गर्ने प्रतिबद्धता जनाए। साथै उनले आफ्नो खेल यात्रा अवधिभर साथ र सहयोग गर्ने सबैलाई आभार व्यक्त गर्दै धन्यवाद पनि दिएका छन्।