भोटेकोशी बाढीपछिको रसुवा र नुवाकोटका ११ जलविद्युत् आयोजनाका ९१९ जना कर्मचारी अझै सम्पर्कविहीन रहेका छन्। नेपाली सेना, सशस्त्र प्रहरी र आयोजनाका प्रतिनिधिसहित संयुक्त टोली रसुवागढी, चिलिमे, लाङटाङ र त्रिशूली आयोजनामा खोजी तथा उद्धार कार्य गर्दैछ। रसुवा भोटेकोशी जलविद्युत् आयोजना रोंगास्थित केबल टनेलमा ड्रोनमार्फत एक शव फेला परेको नेपाली सेनाले जनाएको छ।
भोटेकोशी नदीमा आएको बाढीले विभिन्न जलविद्युत् आयोजनाका मानिसहरू सम्पर्कविहीन भएका छन्, जसको खोजी र उद्धार कार्य जारी गरिएको छ। नेपाली सेनाले मंगलबार रसुवा र नुवाकोटका आयोजनाहरूमा संयुक्त टोली परिचालित गर्दै खोजीमा तीव्रता दिएको छ। रसुवागढी जलविद्युत् आयोजनामा नेपाली सेना र आयोजनाका प्रतिनिधिहरूको टोलीले पावरहाउस र कन्ट्रोल प्वाइन्टसम्म पुगेर खोजी कार्य गरेको छ।
संयुक्त टोलीले रसुवा भोटेकोशी जलविद्युत् आयोजनाको रोंगास्थित केबल टनेलमा ड्रोनमार्फत खोजी गर्दा एक शव फेला परेको नेपाली सेनाले पुष्टि गरेको छ। लाङटाङ जलविद्युत् आयोजनामा पनि संयुक्त टोलीले खोजी तथा उद्धार कार्य निरन्तरता दिइरहेको छ। चिलिमे जलविद्युत् आयोजनामा टनेलभित्र प्रवेश गरी खोजी भइरहेको छ। विदेशी प्राविधिकसहितको टोलीले ६–६ मिटर लामो चारवटा ठूला पाइप प्रयोग गरी हिँड्न मिल्ने बाटो बनाएको छ।
माथिल्लो त्रिशूली–१ जलविद्युत् आयोजनामा पनि विदेशी प्राविधिकसहितको टोलीले मुख्य प्रवेश टनेलमा करिब ४०० मिटर प्रवेश गरी खोजी कार्य गरिरहेको छ। त्रिशूली–३ ‘ए’ जलविद्युत् आयोजनाको पावरहाउस र टनेलमा नेपाली सेनाका ३४ जना, सशस्त्र प्रहरी बलका चार जना र आयोजनाका प्रतिनिधिसहित संयुक्त टोलीले खोजी गरिरहेको छ। माथिल्लो त्रिशूली–३ ‘बी’ आयोजनामा नेपाली सेना १०१ र संगठनका प्रतिनिधिसहितको टोलीले तीनवटा एस्काभेटर प्रयोग गरी करिब २३ फिट गहिराइसम्म खनेर कार्यालय र आवास क्षेत्रमा खोजी गर्दा हालसम्म सम्पर्कविहीन व्यक्तिहरू फेला परेका छैनन्।
सम्बन्धित खबर
