देशभरका ३०० भन्दा बढी विद्यालयको सहभागितामा यू–१८ अन्तरविद्यालय राष्ट्रिय फुटबल प्रतियोगिता भदौ २५ गतेदेखि सातै प्रदेशमा सुरु हुँदैछ। नेपाल राष्ट्रिय खेलकुद परिषद् (राखेप)को अनुमतिमा सञ्चालन हुने प्रतियोगिताको अनुमानित बजेट ८१ लाख रुपैयाँ र कुल पुरस्कार राशि १६ लाख रुपैयाँभन्दा बढी रहेको छ। प्रदेशस्तरीय छनोटबाट छात्र र छात्रातर्फ ६/६ टोली असोज १६ गते काठमाडौंमा हुने राष्ट्रिय फाइनलका लागि चयन हुनेछन्। २४ भदौ, काठमाडौं।
‘एसियन पेन्ट्स च्याम्पियनसिप अन्तरविद्यालय यू–१८ छात्र तथा छात्रा राष्ट्रिय फुटबल प्रतियोगिता २०२६’ आगामी भदौ २५ गतेदेखि सुरु हुँदैछ। प्रतियोगिता सातै प्रदेशका विभिन्न खेल मैदानमा आयोजना गरिनेछ। आयोजकका अनुसार, विद्यालयस्तरका उदीयमान फुटबल प्रतिभालाई राष्ट्रिय मञ्च प्रदान गर्नु यसको मुख्य उद्देश्य हो। प्रतियोगिताअघि आयोजकले भदौ १० गते भोटेकोशी नदीमा आएको विनाशकारी बाढीबाट रसुवा, नुवाकोट र धादिङमा भएको जनधनको क्षतिप्रति गहिरो दुःख व्यक्त गर्दै ज्यान गुमाएकाप्रति श्रद्धाञ्जली तथा प्रभावित परिवारप्रति समवेदना जनाएको छ।
प्रदेशस्तरीय छनोट खेलहरू भदौ २५ गतेदेखि एकसाथ सुरु हुनेछन्। कोशी प्रदेशमा विराटनगर र इटहरी, मधेशमा लालबन्दी, सिमरा र रौतहट, बागमतीमा चितवन र काठमाडौं, गण्डकीमा पोखरा र गोरखा, लुम्बिनीमा घोराही, नेपालगञ्ज र बुटवल तथा सुदूरपश्चिममा धनगढीमा खेल सञ्चालन गरिनेछ। कर्णाली प्रदेशमा विद्यालय संख्या कम भएकाले त्यहाँका टोलीले धनगढीमा गएर छनोट खेल खेल्ने आयोजकले जनाएको छ।
प्रतियोगिताको कुल पुरस्कार राशि १६ लाख रुपैयाँभन्दा बढी रहेको छ। छात्र र छात्रा दुवैतर्फका विजेता टोलीले समान एक–एक लाख रुपैयाँ र उपविजेताले ५०–५० हजार रुपैयाँ प्राप्त गर्नेछन्। प्रतियोगिताका लागि विशेष ट्रफी तयार गरिएको छ। ट्रफी टुर अन्तर्गत नेपालगञ्ज र धनगढीमा प्रदर्शन सम्पन्न भइसकेको छ भने स्थगित भएका पोखरा र विराटनगरमा असोज ३० र ३१ गते ट्रफी टुर आयोजना गरिने आयोजकले जनाएको छ। प्रतियोगितासँगै वातावरण संरक्षणमा जोड्दै ‘एक गोल, एक रुख’ अभियान पनि सञ्चालन गरिनेछ। प्रतियोगिताभरि हुर्कने प्रत्येक गोल बराबर एउटा बिरुवा रोपिने आयोजकले बताएका छन्। एसियन पेन्ट्स मुख्य प्रायोजक रहेको प्रतियोगितामा बीवाइडी, एनसेल, सूर्यज्योति लाइफ इन्स्योरेन्स र मेघा इन्भेस्टमेन्ट बैंक सहप्रायोजक तथा साझेदारका रुपमा रहेका छन्।
