राष्ट्रपति ट्रम्पको घोषणा: मध्यावधि निर्वाचनमा रिपब्लिकनले जिते वयस्क हरेकलाई ५ हजार डलर दिने योजना
राष्ट्रपति डोनाल्ड ट्रम्पले रिपब्लिकन पार्टीले कंग्रेसका दुवै सदन जित्दा हरेक वयस्क अमेरिकीलाई ५ हजार डलर दिने घोषणा गरेका छन्। ट्रम्पले यो रकम अमेरिकाभित्रै खर्च गर्नुपर्ने बताउँदै यसको वित्तीय व्यवस्थाबारे स्पष्ट विवरण दिएका छैनन्। डेमोक्रेट्स र केही विज्ञहरूले ट्रम्पको घोषणा ‘खोक्रो आश्वासन’ भन्दै कानुनी सम्भावनाबारे प्रश्न उठाएका छन्।
२५ भदौ, काठमाडौं। अमेरिकी राष्ट्रपति डोनाल्ड ट्रम्पले आगामी नोभेम्बरको मध्यावधि चुनावमा रिपब्लिकन पार्टीले कांग्रेसका दुवै सदन जितेमा हरेक वयस्कलाई ५ हजार डलर दिने घोषणा गरेका छन्। राष्ट्रपति ट्रम्पले पार्टीको पहिलो राष्ट्रिय सम्मेलनमा यो प्रस्ताव राखेका हुन्। उनले यो रकम कसरी व्यवस्थापन हुनेछ वा कहाँबाट आउने हो भन्ने विषयमा स्पष्ट विवरण दिएका छैनन्। यस योजनालाई लागू गर्न एक खरब डलरभन्दा बढी खर्च हुने अनुमान छ।
ट्रम्पले यो रकम अमेरिकाभित्रै खर्च गर्नुपर्ने शर्त राखेका छन्। डेमोक्रेटहरूले ट्रम्पको घोषणालाई ‘खोक्रो आश्वासन’ भनेका छन्। अन्य आलोचकहरूले यसबारे कानुनी रूपमा सम्भव छ कि छैन भनी प्रश्न उठाएका छन्। अमेरिकामा करिब २७ करोड वयस्क नागरिक रहेका छन्। प्रत्येकलाई ५ हजार डलर दिए अमेरिकामा करिब १.३ खरब डलरको अतिरिक्त बोझ पर्न जान्छ। मूल्यवृद्धि भइरहेको अवस्थालाई लिएर यो योजना लागू हुने सम्भाव्यताबारे पनि चर्चा भइरहेको छ।
ट्रम्पमाथि आफ्नै पार्टीबाटै युद्ध अन्त्य गर्न दबाब परेको छ। बुधबार राष्ट्रपति ट्रम्पले आफ्ना समर्थकहरूलाई मध्यावधि चुनावपछि मात्र युद्ध समाप्ति आउने चेतावनी दिएका छन्। उनले तेलको मूल्य पनि चुनावपछि मात्र घट्ने बताए। टेक्ससमा आयोजित सम्मेलनको भाषणमा उनले तेहरानलाई आणविक हतियार बनाउन नदिन अल्पकालीन आर्थिक कष्ट सहनुपर्ने तर्क गरे। डल्लासमा आयोजित सम्मेलनमा ट्रम्पले अमेरिकीहरूको जीवनस्तर र खर्च गर्ने क्षमतालाई बढाउने बाचा गरे। उनले भने, ‘यदि रिपब्लिकनहरूले हाउस अफ रिप्रिजेन्टेटिभ्स र सिनेट दुवै जिते भने म हरेक अमेरिकी वयस्कलाई ५ हजार डलरको डिभिडेन्ड दिनेछु।’
