ट्रम्प प्रशासनले अमेरिकामा जागिर गुमाएपछि नयाँ रोजगार वा स्पोन्सर खोज्न पाइने ६० दिनको छुट सुविधा हटाउने प्रस्ताव राखेको छ। नयाँ नियम अनुसार एच-१बी र अन्य अस्थायी कामदार भिसा भएका व्यक्तिहरूले जागिर सकिनासाथ अमेरिका छोड्नुपर्नेछ। यो कदमले विदेशी कर्मचारीमा निर्भर अमेरिकी ठूला टेक कम्पनीहरूलाई प्रभाव पार्नसक्ने कुरा होमल्यान्ड सेक्युरिटीले स्वीकार गरेको छ।
२६ भदौ, काठमाडौं। बिहीबार अनलाइनमा सार्वजनिक गरिएको सरकारी सूचनामा यो जानकारी दिइएको छ। अमेरिकी होमल्यान्ड सेक्युरिटी विभागले फेडरल रजिस्टरमा प्रकाशित आफ्नो प्रस्तावित नियम अनुसार, एच-१बी र अन्य अस्थायी कामदार भिसा धारकहरूले जागिर सकिएपछि तुरुन्तै अमेरिका छोड्नुपर्नेछ। यसले ठूलो संख्यामा विदेशी रोजगारमा निर्भर रहेका अमेरिकी ठूला टेक कम्पनीहरूमा असर पुर्याउन सक्छ।
जनवरी २०२५ मा पुनः कार्यभार सम्हालेपछि राष्ट्रपति डोनाल्ड ट्रम्पले कानुनी आप्रवासनलाई सीमित पार्न यो नयाँ पहल अघि सारेका हुन्। उनको प्रशासनले दक्ष विदेशी कर्मचारीहरूको लागि भिसा शुल्क वृद्धि गर्ने निर्णय पनि गरिसकेको छ। साथै नयाँ तालिम कार्यक्रम लागू गर्ने क्रममा विश्वभरका अमेरिकी कुटनीतिक मिशनहरूमा आप्रवासी भिसा नियुक्तिमा अस्थायी रोक लगाइएको छ। होमल्यान्ड सेक्युरिटीले आफ्नो प्रस्तावमा यस परिवर्तनबाट प्रभावित कम्पनीहरूमा केही असुविधा उत्पन्न हुन सक्ने स्वीकार गरेको छ, तर ती पदहरूमा अमेरिकी कर्मचारी राखिने व्यवस्था गर्न सकिने दाबी पनि गरेको छ।
सम्बन्धित खबर
