२७ भदौ, काठमाडौं। शनिबारदेखि भारतको नयाँ दिल्लीमा ब्रिक्स देशहरूको शिखर सम्मेलन सुरु भएको छ। आज दिउँसो भव्य समारोहका बीच वैकल्पिक विश्वशक्तिका नेताहरूको उपस्थितिमा भारतीय प्रधानमन्त्री नरेन्द्र मोदीले सम्मेलनको उद्घाटन गरे। शनिबार दिउँसो नै ब्रिक्स देशहरूले संयुक्त रुपमा नयाँ दिल्ली घोषणापत्र जारी गरी ब्रिक्सको साझा धारणा सार्वजनिक गरिसकेका छन्। त्यस घोषणापत्रमा मध्यपूर्वमा भइरहेका युद्धको विरोधदेखि अमेरिकी राष्ट्रपति डोनाल्ड ट्रम्पले गरेको एकतर्फी ट्यारिफ लगाउनेप्रति आलोचना गरिएको छ।
दिउँसै रूसी राष्ट्रपति भ्लादिमिर पुटिनदेखि चिनियाँ राष्ट्रपति सी जिनपिङसम्म भारतीय प्रधानमन्त्री मोदीले भेटवार्ता गरेका छन्। आज र भोलि गरी दुई दिनसम्म चल्ने शिखर सम्मेलनको पहिलो दिनको सत्र सकिएपछि भारतीय प्रधानमन्त्री मोदीले ब्रिक्सका नेताहरूलाई रात्रिभोज दिएका छन्। भारत मण्डपमा मोदीले दिएको रात्रिभोजको मेन्यु पनि सार्वजनिक भएको छ, जसमा विविध भारतीय परिकारहरू समावेश छन्। रात्रिभोजमा रूसी राष्ट्रपति भ्लादिमिर पुटिनदेखि चिनियाँ राष्ट्रपति सी जिनपिङसम्म सबै पाहुनाहरूका लागि विशेष भारतीय व्यञ्जनहरू तयार गरिएको छ।
मेन्युअनुसार स्टार्टरमा खान्डवी मिल–फ्यू राखिएको छ, जसमा बेसनबाट तयार गरिएको स्टिम रोलमा रायो, नरिवल र करी पातको तड्का गरिएको छ। यसलाई केसर–आँप, माइक्रो ग्रीन्स र दहीको ड्रेसिङसँग प्रस्तुत गरिएको छ। त्यस्तै, खुम्ब गलौटी पनि स्टार्टरका रूपमा राखिएको छ। पुदिनाका पर्ल्ससहित प्यानमा ग्रिल गरिएको नरम च्याउ कबाबलाई सिरमाल रोटीसँग पस्किएको छ।
मुख्य परिकारमा पनीर लबाबदार, गुच्छी मार्मिक लगायतका व्यञ्जनहरू छन्। हिमाचली गुच्छी च्याउलाई केसर, किसमिस र मामरा बदामसँग पकाइएको छ। त्यस्तै, बासमती चामलको भात र बाजरा (मिलेट) प्रयोग गरी तयार गरिएको मिलेट पुलाव तथा बिट रुट राइता मेनुमा समावेश गरिएको छ। मिठाइमा शहतूत फिरनी राखिएको छ। दूध र चामलबाट तयार गरिएको यो फिरनीमा मीठो शहतूत र सुनको वर्क लगाइएको छ। यसका साथै पुरानो दिल्लीको चर्चित शैलीमा तयार गरिएको फ्रुट क्रिम जेरी पनि रात्रिभोजमा समावेश गरिएको छ।
