३० भदौ, काठमाडौं । बंगलादेशको अन्तर्राष्ट्रिय अपराध ट्रीब्युनलले मंगलबार पूर्वप्रधानमन्त्री शेख हसिना नेतृत्वको पार्टी अवामी लिगका सात शीर्ष नेताहरूमाथि मृत्युदण्डको फैसला सुनाएको छ। सन् २०२४ को विद्यार्थी आन्दोलनको क्रममा मानवता विरुद्धका अपराध गरेको आरोपमा उनीहरूलाई मृत्युदण्डको सजाय दिइएको हो। सातै नेतामाथि आन्दोलनका बेला हिंसा भड्काउने, त्यसको निर्देशन गर्ने वा प्रोत्साहन गर्ने आरोप लगाइएको छ। यस मुद्दाका लागि तीन सदस्यीय ट्रीब्युनल (आईसीटी–२)को अध्यक्षमा न्यायाधीश मोहम्मद नजरुल इस्लाम चौधरी नियुक्त थिए।
सातै अभियुक्तविरुद्ध उनीहरूको अनुपस्थितिमा मुद्दा चलाइएको थियो र उनीहरू फरार रहेको बताइएको छ। मृत्युदण्ड सुनाइएका नेतामा अवामी लिगका महासचिव ओबैदुल कादेर, संयुक्त महासचिव एएफएम बहाउद्दिन नसीम र मोहम्मद अली अराफात रहेका छन्। त्यस्तै, जुबो लिगका अध्यक्ष शेख फजले शाम्स पराश, महासचिव मैनुल हुसेन खान निखिल, बंगलादेश छात्र लिगका अध्यक्ष सद्दाम हुसेन र महासचिव शेख वली आसिफ एनान रहेका छन्, जुन बंगलादेशी सञ्चारमाध्यम ढाका ट्रिब्युनले जनाएका छन्। अदालतले सातै अभियुक्तका तर्फबाट सरकारी वकिल नियुक्त गरेको थियो। यसअघि पनि सन् २०२४ कै विद्यार्थी आन्दोलनसँग सम्बन्धित मुद्दामा १० महिनाअघि पूर्वप्रधानमन्त्री शेख हसिनालाई मृत्युदण्ड सुनाइएको थियो।
सम्बन्धित खबर
