अभिषेकले ३० बलमै शतक पूरा गर्दै रोहितको कीर्तिमान तोडे

फोटो क्रेडिट : पंकज नान्गिया/CREIMAS for BCCI अभिषेक शर्माले दिल्लीमा अफगानिस्तानविरुद्ध ३० बलमा शतक पूरा गर्दै भारतका लागि टी–२० अन्तर्राष्ट्रियमा सबैभन्दा छिटो शतकको कीर्तिमान कायम गरे। उनले ३४ बलमा ९ चौका र ११ छक्का प्रहार गर्दै १०८ रन बनाएपछि राशिद खानको बलमा आउट भए। भारतले १३ ओभरमा २ विकेट गुमाएर १६४ रन बनाउँदै विशाल योगफलतर्फ अघि बढिरहेको छ। १ असोज, काठमाडौं । भारतका ओपनर अभिषेक शर्माले टी–२० अन्तर्राष्ट्रिय क्रिकेटमा भारतका लागि सबैभन्दा छिटो शतक बनाउने नयाँ कीर्तिमान कायम गरेका छन्। दिल्लीस्थित अरुण जेटली रंगशालामा अफगानिस्तानविरुद्धको तेस्रो टी–२० मा अभिषेकले केवल ३० बलमा शतक पूरा गर्दै रोहित शर्माको नौ वर्ष पुरानो कीर्तिमान तोडेका हुन्। यसअघि रोहितले सन् २०१७ मा श्रीलंकाविरुद्ध इन्दौरमा ३५ बलमा शतक बनाएका थिए। सुरुआती केही बल सावधानीपूर्वक खेलेका अभिषेकले त्यसपछि आक्रामक शैली अपनाए। उनले अजमतुल्लाह ओमरजाइ, फजलहक फारुकी र राशिद खानजस्ता प्रमुख बलरमाथि लगातार छक्का–चौकाको वर्षा गर्दै ३० बलमै शतक योगफल पूरा गरे। अभिषेक ३४ बलमा ९ चौका र ११ छक्कासहित १०८ रन बनाएर आउट भए। राशिद खानको बलमा विकेटकिपर रहमानुल्लाह गुरबाजले क्याच लिएपछि उनको विस्फोटक इनिङ्स समाप्त भयो। उनको शतकीय इनिङ्स भारतका लागि टी–२० अन्तर्राष्ट्रियमा नयाँ कीर्तिमानका रूपमा दर्ता भएको छ। यो समाचार तयार पार्दासम्म भारतले १३ ओभरमा २ विकेट गुमाएर १६४ रन बनाउँदै विशाल योगफलतर्फ अघि बढिरहेको छ।