ग्लेन म्याक्सवेलको उत्कृष्ट प्रदर्शनमा बेलफास्ट वुल्भ्सले आम्सटर्डम फ्लेम्सलाई ७ विकेटले हराउँदै युरोपियन टी-२० प्रिमियर लिगको फाइनलमा स्थान बनाएको छ। म्याक्सवेलले ४ ओभरमा १८ रन दिएर ४ विकेट लिए, जुन उनको टी-२० करियरको सर्वश्रेष्ठ बलिङ प्रदर्शन हो। बेलफास्टले १३४ रनको लक्ष्य ९ बल बाँकी छँदा ३ विकेट गुमाएर पूरा गर्यो, जसमा डेभोन कोनवेले ३५ र लोरकान टकरले अविजित ३४ रन बनाए। ३ असोज, काठमाडौं।
कप्तान ग्लेन म्याक्सवेलको शानदार प्रदर्शनले बेलफास्ट वुल्भ्सलाई पहिलो संस्करणको युरोपियन टी-२० प्रिमियर लिगको फाइनलमा पुर्याएको हो। बेलफास्टले आम्सटर्डम फ्लेम्सलाई ७ विकेटले पराजित गर्दै प्रतियोगिताको फाइनलमा स्थान बनाएको हो। आम्सटर्डमले दिएको १३४ रनको लक्ष्य बेलफास्टले ९ बल बाँकी छँदा ३ विकेट गुमाएर पूरा गर्यो। बेलफास्टका लागि डेभोन कोनवेले ३५ तथा लोरकान टकरले अविजित ३४ रन बनाए। कप्तान म्याक्सवेलले १० बलमा २१ रन बनाएर अविजित रहे।
त्यसअघि, म्याक्सवेलले उत्कृष्ट बलिङ गर्दै आम्सटर्डमलाई २० ओभरमा १३३ रनमा अलआउट गराएका थिए। उनले ४ ओभरमा १८ रन दिएर ४ विकेट लिए। यो उनको टी-२० करियरको सर्वश्रेष्ठ बलिङ प्रदर्शन हो। म्याथ्यु हम्फ्रिजले ३ तथा क्रिस जोर्डनले १ विकेट लिए। आम्सटर्डमका लागि स्टिभ स्मिथले सबैभन्दा बढी ४५ रन बनाए भने युवराज सम्राले २७ रन जोडे। अब बेलफास्टले फाइनलमा उपाधिका लागि एडिनबर्ग कासल रकर्ससँग प्रतिस्पर्धा गर्नेछ।
सम्बन्धित खबर
