दोस्रो मदन भण्डारी कप अन्तर्राष्ट्रिय आमन्त्रित रनिङ शिल्ड पुरुष भलिबल प्रतियोगिता आजदेखि बुटवलमा सुरु हुँदैछ। असोज १७ गतेसम्म चल्ने प्रतियोगिताको उद्घाटन आज दिउँसो ३ बजे पूर्वराष्ट्रपति विद्यादेवी भण्डारीले गर्नेछिन्। प्रतियोगितामा नेपालका पाँच र विदेशी तीन गरी आठ टोली सहभागी हुनेछन्।
प्रतियोगिताअघि सोमबार बिहान बुटवल अन्तर्राष्ट्रिय सम्मेलन केन्द्रमा ट्रफी सार्वजनिक गरिएको छ। बुटवल उपमहानगरपालिकाकी उपप्रमुख सावित्रा अर्यालले ट्रफी सार्वजनिक गर्दै अन्तर्राष्ट्रिय भलिबल प्रतियोगिताले बुटवललाई खेलकुद पर्यटनको गन्तव्यको रूपमा चिनाउन सहयोग पुग्ने बताइन्। मदन भण्डारी स्पोर्ट्स एकेडेमीका अध्यक्ष ध्रुव आचार्यका अनुसार प्रतियोगितामा नेपालबाट नेपाल पुलिस क्लब, एपीएफ क्लब, मणिमुकुन्द भलिबल क्लब, सभापोखरी भलिबल क्लब र गल्कोट भलिबल क्लबले प्रतिस्पर्धा गर्नेछन्।
विदेशी टोलीमा भारतका गुजरात स्टेट भलिबल एसोसिएसन, खैरा क्लब पञ्जाब तथा श्रीलंकन पुलिस टोली सहभागी छन्। प्रतियोगिताको विजेताले रनिङ शिल्डसहित ७ लाख रुपैयाँ प्राप्त गर्नेछ भने उपविजेताले ३ लाख ५० हजार, तेस्रोले १ लाख ७५ हजार र सान्त्वना टोलीले ७५ हजार रुपैयाँसहित कप, मेडल र प्रमाणपत्र पाउनेछ। यस्तै उत्कृष्ट खेलाडीलाई १५ हजार रुपैयाँ तथा उत्कृष्ट स्पाइकर, सेटर, सर्भर, ब्लकर, डिफेन्डर र प्रशिक्षकलाई जनही ८ हजार रुपैयाँ नगदसहित सम्मान गर्नेछ। प्रत्येक खेलको प्लेयर अफ द म्याचले ५ हजार रुपैयाँ पुरस्कार पाउने आयोजकले जनाएको छ। ट्रफी सार्वजनिक कार्यक्रममा नेपाल भलिबल संघका उपाध्यक्ष भरत शाह, मदन भण्डारी स्पोर्ट्स एकेडेमीका उपाध्यक्ष मोहन रेग्मी, गणेश ठगुनालगायत पदाधिकारीको उपस्थिति रहेको थियो।
