नेपाली क्रिकेट टोली यसपटक हङकङ सिक्सेस क्रिकेटमा सहभागी नहुने भएको छ। क्यान सचिव पारस खड्काले एनपीएल र हङकङ सिक्सेसको तालिका जुधेकाले टिम पठाउन कठिन देखिएको बताए। प्रतियोगिता अक्टोबर ३० देखि नोभेम्बर १ सम्म हङकङको तिनकोङ रोड रिक्रिएसन ग्राउन्डमा हुनेछ।
आयोजकले सोमबार सार्वजनिक गरेको टिमहरूको सूचीमा नेपालको नाम समावेश छैन। यसपटक प्रतियोगितामा स्कटल्यान्डले पनि भाग लिएको छ। प्रतियोगितामा हङकङ, ओमान, यूएई, स्कटल्यान्ड, अस्ट्रेलिया, दक्षिण अफ्रिका, भारत, श्रीलंका, पाकिस्तान, अफगानिस्तान, इङ्ल्याण्ड र बंगलादेशका टोलीहरू छन्। नेपाल क्रिकेट संघ (क्यान) का सचिव पारस खड्काले यसपटक सहभागी हुन कठिनाइ भएको बताए।
‘हाम्रो एनपीएल हुने समयमा हङकङ सिक्सेस हुने तय भएको छ, त्यसकारण टिम पठाउन गाह्रो देखिएको छ,’ पारसले भने। यसअघि नेपाल दुई संस्करणसम्म यस प्रतियोगितामा सहभागी भइसकेको छ। हङकङ सिक्सेसका खेलहरू ६ ओभर मात्र हुन्छन् र प्रत्येक टिममा ६ जना खेलाडी हुन्छन् जसको मुख्य उद्देश्य हरेक बलमा छक्का लगाउनु हो।
यो प्रतियोगितामा विशेष रूपमा अन्तर्राष्ट्रिय क्रिकेटबाट सन्यास लिइसकेका खेलाडीहरूलाई समावेश गरेर टोली पठाइन्छ। ६ जनामात्र खेल्ने हुनाले ब्याटिङ र बलिङ दुवैमा दक्ष खेलाडीहरू छनोट गरिन्छन्।
