विमानचालकहरूबीचको विवादका कारण संयुक्त अरब इमिरेट्सको दुबईबाट इजरेलको तेल अवीव तर्फ उडेको यात्रुवाहक विमान साउदी अरबतर्फ मोडिएको इजरेली अधिकारीहरूले स्थानीय सञ्चार माध्यमलाई बताएका छन्। उडान ट्र्याक गर्ने वेबसाइट ‘फ्लाइटरेडार२४’ का अनुसार, यूएईको दुबई अन्तर्राष्ट्रिय विमानस्थलबाट बुधबार बिहान उडेको फ्लाइदुबईको यो विमान दुई घण्टापछि आपतकालीन संकेत पठाएको थियो। केही मिनेटपछि उक्त संकेतलाई बदलेर विमान अपहरण भएको संकेत दिइएको थियो। पछि पुनः यो सामान्य आपतकालीन संकेतमा परिणत गरिएको थियो। विमानमा करिब १५० जना सवार थिए, जसमा अधिकांश इजरेली नागरिक थिए। उडान नम्बर एफजेड१०५३ (FZ1053) को यो विमान बेन-गुरियन विमानस्थलमा अवतरण गर्ने योजना बनाइएको थियो। तर विमानचालकहरूबीच विवाद भएपछि विमान अप्रत्याशित रूपमा उत्तरपूर्वी साउदी अरबको तबुक विमानस्थलमा अवतरण गरेको अधिकारीहरूले जनाएका छन्।
इजरेली अधिकारीहरूले बताएका छन् कि एक पाइलटले विमान आफ्नो नियन्त्रणमा लिनुअघि अर्का पाइलटलाई चक्कु प्रहार गरेको भनिएको छ। विमान सवार यात्रुहरूले पनि विमानभित्र धारिलो हतियार प्रयोग भएको बताएका छन्। फ्लाइदुबईका प्रवक्ताले विमानमा “उडानको क्रममा एउटा घटना भएको” पुष्टि गरेका छन्। तर थप विवरण प्राप्त भएपछि मात्र जानकारी अद्यावधिक गरिने बताइएको छ। “हाम्रा टोलीहरू सम्बन्धित निकायहरूसँग समन्वय गरेर काम गरिरहेका छन्,” उनीहरूले बताएका छन्।
फ्लाइटरेडार२४का तथ्यांक अनुसार उडान गरेको दुई घण्टापछि यो विमान यूटीसी ०५:२१ बजेपछि दुई मिनेट नबित्दै १७,००० फिट (५,००० मिटरभन्दा बढी) तीव्र गतिमा झर्दै गएको देखिन्छ। यो विमान यूटीसी ५:४० बजे केही समयका लागि जोर्डनको आकाशमा प्रवेश गरी केही मिनेटपछि साउदी अरब फर्किएको थियो। साउदी अरबको आकाशमा पुगेपछि विमान अवतरणको लागि तल झर्ने स्थिति आएको छ। विमान अपहरण भएको आशङ्कामा इजरेली प्रधानमन्त्री र रक्षामन्त्रीले तत्काल आपतकालीन छलफल गरेका थिए। अपेक्षित उडान मार्गबाट अप्रत्याशित रूपमा विमाने मोडिएपछि इजरेली वायुसेनाले लडाकु विमानहरू परिचालन गरेको थियो। प्रधानमन्त्री नेतन्याहूले विज्ञप्ति जारी गरी स्थिति नियन्त्रणमा रहेको र साउदी अरबबाट इजरेली यात्रुहरूलाई सुरक्षित स्वदेश फर्काउने प्रयास भइरहेको जानकारी दिएका छन्।
