इरान वरिपरि अमेरिकी सैन्य उपस्थिति बढ्छ, स्ट्रेट अफ होर्मुजमा तेल ट्यांकरमा आगो लाग्यो

१६ असोज, काठमाडौं । अमेरिकाले इरान वरिपरिका क्षेत्रमा आफ्नो सैन्य उपस्थिति विस्तार गरिरहेको छ। अमेरिकी एक अधिकारीको उद्धृत गर्दै अल जजीराले जनाएको छ कि इरान नजिकै तीनवटा विमानवाहक पोत (एयरक्राफ्ट क्यारियर) र दुईवटा मरीन ल्यान्डिङ समूह तैनाथ गर्ने तयारी भइरहेको छ। अधिकारीका अनुसार अमेरिकी नौसेनाको रुजवेल्ट स्ट्राइक ग्रुप र करिब २ हजार अमेरिकी मरीन सैनिकसहितको मकिन आइल्यान्ड फोर्स स्यान डिएगोबाट प्रस्थान गरिसकेको छ। यो सैन्य उपस्थिति नोभेम्बरभित्र पूर्णरूपमा विस्तार हुने बताइएको छ।

यसै क्रममा, बेलायतको युके मेरिटाइम ट्रेड अपरेशन्सले स्ट्रेट अफ होर्मुज हुँदै गुज्रिरहेका एक विशाल तेल ट्यांकरमा अज्ञात वस्तुको प्रहारबाट आगो लागेको जनाएको छ। उक्त सुपरट्यांकरमा २५ लाख ब्यारेल तेल रहेको बताइएको छ। युके मेरिटाइम ट्रेड अपरेशन्सका अनुसार यो घटना होर्मुज जलडमरुको क्षेत्रमा भएको हो। कसले प्रहार गरे भन्ने विषयमा अहिलेसम्म पुष्टि हुन सकेको छैन। घटनापछि जहाजको अवस्था र सुरक्षासम्बन्धी थप विवरण सार्वजनिक हुन बाँकी छ। होर्मुज जलडमरु विश्वका मुख्य ऊर्जा आपूर्ति मार्गमध्ये एक मानिन्छ र पछिल्ला वर्षहरूमा यस क्षेत्रमा सैन्य तनाव र समुद्री सुरक्षासम्बन्धी घटनाहरू बढ्दै गएका छन्।