कोशीमा दसैँका १० दिनमा ५७ जनाको मृत्यु, २२५ घटनामा ६५ घाइते

विराटनगर, १२ कात्तिक। कोशी प्रदेशमा यस वर्षको दसैँ समग्रमा शान्तिपूर्ण रूपमा सम्पन्न भएको प्रहरीले जनाएको छ। तर चाडपर्वको १० दिनको अवधिमा विभिन्न आपराधिक तथा दुर्घटनाजन्य घटनामा ५७ जनाले ज्यान गुमाएका छन् भने ६५ जना घाइते भएका छन्। प्रदेश प्रहरी कार्यालय विराटनगरका अनुसार फूलपातीदेखि कोजाग्रत पूर्णिमासम्म प्रदेशका १४ जिल्लामा कुल २२५ वटा घटना दर्ता भएका छन्। ती घटनामध्ये आत्महत्या, कुटपिट, विष सेवन र आगलागीका घटना उल्लेख्य रहेका छन्। आत्महत्याका घटनामा मात्रै ४० जनाको मृत्यु प्रहरीको तथ्यांकअनुसार दसैँ अवधिमा आत्महत्यासम्बन्धी ४४ घटना भएका छन्। ती घटनामा ४० जनाको मृत्यु भएको छ।

त्यस्तै, कुटपिटका ३६ घटनामा ३१ जना घाइते भएका छन्। विष सेवनका २४ घटनामा तीन जनाको मृत्यु हुनुका साथै ११ जना घाइते भएका छन्। प्रदेशभर आगलागीका २३ घटना भएका छन्। ती घटनामा एक जनाको मृत्यु भएको प्रहरीले जनाएको छ। यसका अतिरिक्त धारिलो हतियार प्रहार, डुबेर मृत्यु, जनावरको आक्रमण तथा करेन्ट लाग्नेलगायतका घटनामा पनि मानवीय क्षति भएको छ। प्रहरीले विभिन्न घटनामा संलग्न रहेको आरोपमा ५९ जनालाई पक्राउ गरेको छ।

दसैँ सुरक्षामा आठ हजारभन्दा बढी प्रहरी परिचालन चाडपर्वका बेला शान्तिसुरक्षा कायम गर्न कोशी प्रदेश प्रहरीले विशेष सुरक्षा योजना लागू गरेको थियो। दसैँ अवधिभर प्रदेशका विभिन्न जिल्लामा आठ हजार १३३ भन्दा बढी प्रहरी परिचालन गरिएको प्रदेश प्रहरी कार्यालयले जनाएको छ। यात्रुको सुरक्षा र सहजताका लागि प्रदेशका ७२ स्थानमा यात्रु सहायता कक्ष स्थापना गरिएको थियो। साथै मोबाइल तथा पैदल गस्ती, संयुक्त चेकजाँच र प्रमुख राजमार्गहरूमा स्कर्टिङको व्यवस्था गरिएको थियो। तिहार र छठमा पनि सुरक्षा व्यवस्था कडा बनाइने कोशी प्रदेश प्रहरी प्रमुख डीआईजी शेखर खनालले छिटपुट आपराधिक तथा दुर्घटनाजन्य घटना भए पनि समग्र शान्तिसुरक्षाको अवस्था नियन्त्रणमा रहेको बताएका छन्। उनका अनुसार प्रहरीको सक्रिय परिचालन, नियमित गस्ती र सुरक्षा निगरानीका कारण दसैँमा ठूला सुरक्षा चुनौती उत्पन्न भएनन्।

आगामी तिहार तथा छठ पर्वलाई समेत सुरक्षित र व्यवस्थित बनाउन विशेष सुरक्षा व्यवस्थालाई निरन्तरता दिइने उनले जानकारी दिए। दसैँ शान्तिपूर्ण रूपमा सम्पन्न भएको प्रहरीको मूल्यांकन रहे पनि १० दिनमै ५७ जनाको मृत्यु र ६५ जना घाइते भएको तथ्यांकले चाडपर्वका बेला दुर्घटना न्यूनीकरण, मानसिक स्वास्थ्य सचेतना र नागरिक सुरक्षामा थप ध्यान दिनुपर्ने आवश्यकता देखाएको छ।