सभामुख अर्यालले समिति सभापतिहरूलाई विधेयक अघि बढाउन आग्रह गरे

काठमाडौं — सभामुख डोलप्रसाद (डीपी) अर्यालले प्रतिनिधिसभाका विषयगत समितिमा विचाराधीन विधेयकहरूको छलफललाई तीव्रता दिन समिति सभापतिहरूलाई आग्रह गरेका छन्। विषयगत समितिका सभापतिहरूसँग समसामयिक विषयमा छलफल गर्दै उनले विधेयकमाथि गहन छलफल गरी समितिको कामकारबाही प्रभावकारी र परिणाममुखी बनाउनुपर्नेमा जोड दिए।

सभामुख अर्यालले संशोधन प्रस्ताव दर्ता गर्दा प्रचलित नियमावली र कानुनी प्रक्रियाको पालना गर्नुपर्ने बताए। सम्बन्धित राजनीतिक दल र विषयविज्ञहरूसँग आवश्यक परामर्श गरी औचित्यपूर्ण संशोधन प्रस्ताव ल्याउन पनि उनले आग्रह गरे। ‘विधेयकमाथि संशोधन प्रस्ताव दर्ता गर्दा प्रचलित नियम र प्रक्रियाको पालना गर्नुपर्छ। सम्बन्धित दल तथा विषयविज्ञहरूसँग आवश्यक छलफल गरी औचित्यपूर्ण संशोधन प्रस्ताव राख्नुहोस्,’ उनले भने।