काठमाडाैं । सर्वोच्च अदालतका प्रस्तावित न्यायाधीश डा. रत्नबहादुर बागचन्दले अदालतलाई अनुसन्धान, विश्लेषण र संस्थागत ज्ञानको केन्द्रका रूपमा विकास गर्नुपर्ने बताएका छन्। शुक्रबार संसदीय सुनुवाइ समितिमा कार्ययोजना प्रस्तुत गर्दै उनले जिल्ला र उच्च अदालतका अनुभवलाई एकीकृत गरी सर्वोच्चलाई केन्द्रीय न्यायिक ज्ञानको केन्द्र बनाउने अवधारणा अघि सारे।
बागचन्दले आफ्नो विद्यावारिधि अनुसन्धानमा आधारित फैसला कार्यान्वयनको पाँचौँ मोडेलबारे पनि जानकारी दिए। न्यायपालिकाको अधिकार सुरक्षित राख्दै कार्यपालिकाको प्रशासनिक क्षमता र स्रोत परिचालनसँग समन्वय गर्ने उक्त अवधारणा भविष्यको नीतिगत आधार बन्न सक्ने उनको भनाइ छ।
उनीले साइबर अपराध, डिजिटल प्रमाणको सुरक्षा र कृत्रिम बुद्धिमत्ताको प्रयोगमा गोपनीयता, विश्वसनीयता तथा मानवीय निगरानी सुनिश्चित गर्नुपर्ने बताए। न्यायिक निर्णयको अन्तिम जिम्मेवारी न्यायाधीशमै रहनेमा उनले जोड दिए।
न्यायिक संग्रहालय स्थापना, अभिलेख संरक्षण र मुद्दाको पूर्वतयारी व्यवस्थित गर्दै निष्पक्ष, कारणयुक्त र समयमै न्याय सम्पादन गर्ने आफ्नो प्राथमिकता रहेको बागचन्दले बताए।
सम्बन्धित खबर
