नेपाल राष्ट्रिय तथा अन्तर्राष्ट्रिय खेलाडी संघले २०औं एनएनआईपीए स्पोर्ट्स अवार्ड २०८२ को तयारी सम्पन्न गरेको छ। २६ विभिन्न खेलका खेलाडीलाई जनही १५ हजार रुपैयाँ नगदसहित सम्मान गरिनेछ भने सर्वोत्कृष्ट खेलाडीलाई जनही १ लाख रुपैयाँ प्रदान गरिने योजना गरिएको छ। यो पुरस्कार कार्यक्रम पहिलोपटक काठमाडौं उपत्यका बाहिर बनेपा नगरपालिकाको चण्डेश्वरी मन्दिर परिसरमा आयोजना गरिनेछ।
१८ चैत, काठमाडौं। नेपाल राष्ट्रिय तथा अन्तर्राष्ट्रिय खेलाडी संघ (एनएनआईपीए) का अध्यक्ष शिवसुन्दर गोथेले बुधबार आयोजित पत्रकार सम्मेलनमा सम्पूर्ण तयारी पूरा भएको जानकारी दिएका छन्। स्थानीय आयोजक बनेपा नगरपालिकाका मेयर शान्तिरत्न शाक्यले उक्त अवार्डमा सहभागी सबैलाई स्वागत गर्ने तयारीमा रहेको बताए र पुरस्कार आयोजना गर्न पाएकोमा खेलाडी संघलाई धन्यवाद व्यक्त गरे।
महासचिव गोथेले २६ विभिन्न खेलका उतिकै संख्यामा खेलाडीलाई पुरस्कार वितरण गरिने बताए। फुटबल, एथलेटिक्स, ह्यान्डबल, गोल्फ, उसु, भारोत्तोलन, जुडो, ब्याडमिन्टन, आर्चरी, फेन्सिङ, ट्रायथलन, पौडी, कुस्ती, बास्केटबल, कबड्डी, कराते, भलिबल, तेक्वान्दो, जिम्न्याष्टिक, ल्यान टेनिस, हक्की, टेबल टेनिस, बक्सिङ, स्की, क्यानोइङ र साइकलिङका खेलाडीलाई प्रत्येकलाई १५ हजार नगद पुरस्कारसहित सम्मान गरिनेछ।
त्यसै गरी पुरुष र महिला सर्वोत्कृष्ट खेलाडीलाई जनही १ लाख रुपैयाँ पुरस्कार दिइनेछ भने प्रतिभाशाली खेलाडीलाई ५० हजार रुपैयाँ प्रदान गरिनेछ। एक वरिष्ठ खेल व्यक्तित्वलाई गजराज जोशी आदर्श खेल व्यक्तित्व पुरस्कार र एक खेल पत्रकारलाई एनएनआईपीए खेल पत्रकारिता पुरस्कारसहित ३५ हजार रुपैयाँ नगद प्रदान गरिनेछ। उत्कृष्ट पारा खेलाडीलाई पनि १५ हजार रुपैयाँ नगद पुरस्कारसहित सम्मान गरिनेछ। अवार्ड कार्यक्रम चण्डेश्वरी मन्दिर परिसर, बनेपा नगरपालिकामा आयोजना गरिनेछ जुन काठमाडौं उपत्यका बाहिर पहिलो पटक हुँदैछ।
