काठमाडौंमा ट्राफिक प्रहरीले पुराना सवारी साधनमा कडा नियन्त्रण, ३१ चालकलाई कारबाही गरेको छ

१९ चैत, काठमाडौं । काठमाडौंमा एक विशेष ट्राफिक चेकजाँच कार्यक्रमअन्तर्गत यान्त्रिक अवस्थामा समस्या भएका ३१ सवारी साधनका चालकलाई ट्राफिक प्रहरीले कारबाही गरेको छ। मुलपानी क्रिकेट ग्राउन्ड नजिक गरिएको उक्त विशेष चेकजाँचमा अधिकांश सवारी साधनहरूको यान्त्रिक अवस्था असन्तोषजनक रहेको काठमाडौं उपत्यका ट्राफिक प्रहरी कार्यालयले जनाएको छ। जसमा अत्यन्त खराब अवस्थामा रहेका ३१ सवारी साधनका चालकहरूलाई कारबाही गरिएको छ। ५२ वटा सवारी साधनहरूको निरीक्षण गर्दा हेन्डब्रेक, लाइट, टायर लगायतका उपकरणहरू दुरुस्त नपाइएको र तीमध्ये ३१ सवारी साधन यान्त्रिक रूपमा समस्या भएका पाइएका थिए। ट्राफिक प्रहरीले जनाएको छ, यस्ता अवस्था ठीक नभएका सवारी साधन प्रयोग गर्दा दुर्घटना हुने जोखिम उच्च हुने र यात्रुहरूको जीवन जोखिममा पर्न सक्ने भएकाले जोखिम न्यूनीकरणका लागि यो चेकजाँच गरिएको हो।