२३ चैत, हेटौंडा। बागमती प्रदेशका मुख्यमन्त्री ईन्द्रबहादुर बानियाँले नेपाली कांग्रेस र नेकपा एमालेबीच विगतमा भएको मुख्यमन्त्रीको आलोपालो भागबण्डाबारे आफूलाई कुनै जानकारी नभएको बताएका छन्। सत्ता साझेदार दल एमालेले विगतमा कांग्रेससँग गरेको सहमतिअनुसार नेतृत्व हस्तान्तरणको विषय उठाइरहेको बेला मुख्यमन्त्री बानियाँले भागबण्डाबारे अनभिज्ञता जाहेर गरेका हुन्। ‘भागबण्डाको कुरा मलाई थाहा छैन। पार्टी नेतृत्वलाई पनि यसबारे कुनै जानकारी छैन,’ सोमबार मुख्यमन्त्री कार्यालयमा भएको मुख्यमन्त्री तथा मन्त्रीहरूको पत्रकारसँग अन्तरसंवादमा उनले भने, ‘यहाँ कांग्रेस र एमालेका मन्त्रीहरू हुनुहुन्छ तर उहाँहरूलाई पनि थाहा छैन।’
कांग्रेस र एमालेबीच गत वर्ष साउनमा संयुक्त सरकार निर्माण हुँदा २०/२० महिना आलोपालो मुख्यमन्त्री हुने सहमति थियो, जतिबेला एमालेको समर्थनमा कांग्रेसबाट दलका नेतासमेत रहेका बहादुरसिंह लामा मुख्यमन्त्री नियुक्त भएका थिए। लामाले एमाले संसदीय दलका नेता जगन्नाथ थपलियालाई सत्ता हस्तान्तरण गर्ने सहमति भएको कांग्रेसको लामा पक्षका सांसद बताउँछन्। थपलियाले पूर्वसहमति अनुसार फागुनपछि नेतृत्व हस्तान्तरण हुनुपर्ने विषय उठाउँदै आएका छन्। तर, लामा मुख्यमन्त्री बनेको एक वर्षपछि कांग्रेस संसदीय दलमा बहुमत जुटाएका बानियाँले अविश्वास प्रस्ताव दर्ता गरेर उनलाई हटाएका थिए। चालु आर्थिक वर्ष २०८१/८२ को बजेटमा पार्टीभित्रको विवादपछि जसको बलमा आफ्नो पक्षमा बहुमत सांसद जुटाउँदै तत्कालीन पार्टी सभापति शेरबहादुर देउवाको समर्थनमा बानियाँले लामालाई सरकारबाट हटाएर आफू मुख्यमन्त्री बनेका थिए। बानियाँ २० साउन २०८२ मा मुख्यमन्त्री बने। ९ साउन २०८२ मा मुख्यमन्त्री रहेका दल नेता लामाविरुद्ध बानियाँकै नेतृत्वमा २१ सांसदले अविश्वास प्रस्ताव दर्ता गराए। १३ साउनमा अविश्वास प्रस्तावमाथि भएको मतविभाजनमा २२ मतले प्रस्तावको पक्षमा र १५ मतले विपक्षमा पछि लामाले दल नेताको हैसियत गुमाएका थिए। गत १४ साउनमा दलको नेता चयनका लागि भएको निर्वाचनमा लामालाई पराजित गरेपछि बानियाँको मुख्यमन्त्री हुने बाटो खुलेको थियो। त्यसअगाडि १३ पुस २०७९ मा भएको दल नेताको निर्वाचनमा लामासँग बानियाँ ५ मतले पराजित भएका थिए।
