शैक्षिक संस्थामा दुर्व्यवहार र शोषण भएमा मन्त्रालयमा सिधै शिकायत गर्नुहोस्

शैक्षिक संस्थामा हुने दुर्व्यवहार र शोषणविरुद्ध कारबाहीका लागि शिक्षा, विज्ञान तथा प्रविधि मन्त्रालयले विशेष संयन्त्र सञ्चालनमा ल्याएको छ। शिक्षा मन्त्री सस्मित पोखरेलले यस सम्बन्धमा ‘शून्य सहनशीलता’ नीति लागू गरिएको जानकारी दिएका छन्। मन्त्री पोखरेलले पीडित वा जानकारी दिने व्यक्तिको पहिचान पूर्ण रूपमा गोप्य राखिने तथा गुनासो दर्ता गर्न आग्रह गरेका छन्। २५ चैत, काठमाडौं। शिक्षा, विज्ञान तथा प्रविधि मन्त्रालयले शैक्षिक संस्थामा हुने दुर्व्यवहार र शोषणका घटनामा दोषीलाई कारबाही गर्न विशेष संयन्त्र सञ्चालनमा ल्याएको छ। शिक्षा मन्त्री सस्मित पोखरेलका अनुसार, शिक्षण संस्थामा हुने कुनै पनि प्रकारका दुर्व्यवहार र शोषणविरुद्ध ‘शून्य सहनशीलता’ नीति अंगिकार गर्दै उक्त संयन्त्र सञ्चालन गरिएको हो। ‘विद्यार्थीहरूले भोग्नुपर्ने कुनै पनि प्रकारका उत्पीडन वा दुर्व्यवहारका घटनाहरूलाई गम्भीरतापूर्वक लिएर त्यस्ता गुनासोहरू प्रत्यक्ष रूपमा सुन्न र तत्काल कानुनी तथा प्रशासनिक कारबाही अगाडि बढाउँन यो विशेष संयन्त्र बनाइएको हो,’ मन्त्री पोखरेलले बताए। पीडित वा जानकारी दिने व्यक्तिको पहिचान पूर्ण रूपमा गोप्य र सुरक्षित राखिने प्रतिबद्धता जनाउँदै, मन्त्री पोखरेलले गुनासो दर्ता गर्न आग्रह गरे। ‘सुरक्षित शैक्षिक वातावरण निर्माण गर्ने सरकारले चलाएको यस अभियानमा यहाँहरूको सक्रिय सहभागिता र सहयोगको अपेक्षा गरिएको छ,’ उनले थपे।