२६ चैत, काठमाडौं । एमालेका कार्यवाहक अध्यक्ष रामबहादुर थापाले संसद्मा दिएका अभिव्यक्तिका कारण पार्टीभित्रको विवाद शान्त हुन नसकेको समयमा उपमहासचिव योगेश भट्टराईले व्यङ्ग्यात्मक शैलीमा कविता लेखेका छन्। उनको कवितामा ‘बादल’, ‘जबज’ र ‘मदन’ जस्ता शब्दहरू समावेश छन् र ‘हेरेको हेर्यै’ भन्ने टिप्पणी गरिएको छ। उनले लेखेका छन्– “बादल मडारियो मुसलधारे वर्षा भयो जबज निथ्रुकै भिज्यो मदन तीन छक्क पर्नुभयो हामी हेरेको हेर्यै भयौँ! (स्वाट्ट बिउंझिएको त कोठामा घाम छिरिसकेको रहेछ)”
पार्टीका अध्यक्ष केपी शर्मा ओलीको पक्राउपछि कार्यवाहक अध्यक्ष र संसदीय दलको नेता चुनिएका बादलले प्रतिनिधि सभाको १९ चैतको बैठकमा दिएको सम्बोधन विवादास्पद बनेको थियो। उनले चुनाव नतिजालाई लिएर सेना, कर्मचारी र अन्तराष्ट्रिय समुदायलाई समेत दोषारोपण गरेका थिए र ऐतिहासिक जितका लागि रास्वपालाई बधाई दिएका थिए। यसपछि उपाध्यक्ष विष्णु पौडेलले बादलको अभिव्यक्ति पार्टीको स्थापित नीति र मान्यतासँग असंगत रहेको भन्दै फेसबुकमा आलोचना गरेका थिए। भोलिपल्ट बसेको सचिवालय बैठकमा पनि बादलको आलोचना गरिएको थियो।
