समाचार सारांश नयाँ प्रतिनिधिसभामा श्रम संस्कृति पार्टीले उपसभामुख पद पाएको छ र रुबीकुमारी ठाकुर उपसभामुख बन्न लगभग निश्चित छ। रास्वपाले श्रम संस्कृति पार्टीलाई समर्थन गर्ने निर्णय गरेको छ जसले रुबीकुमारी ठाकुरलाई दुई तिहाइभन्दा बढी समर्थन दिलाएको छ। राप्रपा संसदीय दलका नेता ज्ञानेन्द्रबहादुर शाहीले रास्वपाको समर्थनबारे प्रश्न उठाएका छन्। २६ चैत, काठमाडौं। नयाँ प्रतिनिधिसभा गठनपछि रास्वपा नेतृत्वको सरकारलाई सदन र बाहिरबाट छिनछिनमा खबरदारी गर्ने व्यक्ति हुन् – हर्क साम्पाङ। श्रम संस्कृति पार्टीका अध्यक्ष समेत रहेका साम्पाङ प्रायः सामाजिक सञ्जालमा सरकार र रास्वपाका कार्यशैलीमाथि प्रश्न उठाउँछन्। विपक्षी बेन्चमा बसेर सरकारलाई खबरदारी गर्ने साम्पाङ नेतृत्वको पार्टीलाई रास्वपाले उपसभामुखलाई समर्थन गर्ने निर्णय गरेको छ।
संसदमा पहिलो पटक नयाँ शक्तिको रूपमा प्रवेश गरेको श्रम संस्कृतिलाई प्रतिनिधिसभाको उपसभामुख जस्तो विशिष्ट पद प्राप्त भएको हो। सात जना सांसद रहेको यो पार्टीकी उम्मेदवार रुबीकुमारी ठाकुर उपसभामुख बन्ने लगभग निश्चित छ। किनभने रास्वपाको समर्थन पाउँदा उनको पक्षमा संसद्को दुई तिहाई भन्दा बढी समर्थन हुन्छ। नयाँ चुनावपछि परिवर्तनकारी शक्तिहरू मिलेर जान श्रम संस्कृतिलाई समर्थन गरेको रास्वपाका महामन्त्री कविन्द्र बुर्लाकोटीले जानकारी दिएका छन्। रास्वपाबाट प्रतिनिधिसभाको सभामुख भएकाले संवैधानिक प्रावधानअनुसार अर्को दल र लिङ्गको व्यक्तिलाई उपसभामुख बन्नुपर्छ।
त्यसै आधारमा रास्वपाले श्रम संस्कृति पार्टीलाई कि राप्रपालाई समर्थन गर्ने भन्ने विषयमा दोहोरो छलफल भएको थियो। राप्रपा संसदीय दलका नेता ज्ञानेन्द्रबहादुर शाहीले केही दिनअगाडि रास्वपा सभापति रवि लामिछानेलाई भेटेका थिए। त्यस क्रममा उपसभामुखका उम्मेदवारलाई समर्थन गर्ने विषयमा वार्ता भएको थियो। बिहीबार पनि रास्वपाका सभापति लामिछानेसँग कुरा भएको र त्यस क्रममा राप्रपालाई समर्थन गर्ने आश्वासन पाएको शाहीले बताएका थिए।
