नेपालका फोटो पत्रकार नरेन्द्र श्रेष्ठको सिंहदरबार जलिरहेको तस्बिर यस वर्षको वर्ल्डप्रेस फोटो प्रतियोगितामा उत्कृष्ट घोषित गरिएको छ। यो तस्बिर जेनजी आन्दोलनको क्रममा सिंहदरबारमा लागेको आगोको सजीव प्रतिविम्ब हो। वर्ल्डप्रेस फोटो प्रतियोगिताको ७१ वर्ष लामो इतिहासमा पहिलो पटक नेपाली फोटो पत्रकारले खिचेको तस्बिरलाई उत्कृष्ट ठहर गरिएको हो। अघिल्ला वर्षहरूमा नेपालमा भएका घटनाहरूका तस्विरहरू विदेशी फोटो पत्रकारहरूले खिचेर पुरस्कार पाउँदै आएका थिए।
यस पटक प्रतियोगितामा १४१ वटा देशका ३७,०४७ फोटो पत्रकारहरूले भाग लिएका थिए। तीमध्ये ‘वेस्ट सेन्ट्रल एण्ड साउथ एसिया’ श्रेणीमा श्रेष्ठको तस्बिरले प्रथम स्थान हासिल गरेको हो। कुल ५७,००० भन्दा बढी तस्बिरहरूबाट छानिएको यो चित्रलाई उत्कृष्ट मानिएको छ। श्रेष्ठले भने, ‘म २५ वर्षदेखि यस क्षेत्रमा निरन्तर लागिरहेकाछु। यसपटक सफलता पाउँदा अत्यन्त हर्ष महसूस हुन्छ। विश्वका कुनै पनि फोटो पत्रकारको लागि यो प्रतियोगितामा जित्नु ठूलो सम्मान हो।’
नेदरल्याण्डमा आधारित उक्त गैर सरकारी संस्थाले विश्वभर तस्बिर प्रदर्शनी र विविध कार्यक्रमहरू आयोजना गर्दछ। श्रेष्ठले वर्ल्डप्रेस फोटोमा चयन भएको फोटो युरोपियन फोटो एजेन्सी (ईपीए)का लागि खिचेका हुन्।
सम्बन्धित खबर
