पूर्वप्रधानमन्त्री बाबुराम भट्टराई आइतबार भारत प्रस्थान गर्दै

२८ चैत, काठमाडौं । पूर्वप्रधानमन्त्री डा. बाबुराम भट्टराई भारत जान लागेका छन् । उनी चैत २९ गते आइतबार भारतको आईटीएम विश्वविद्यालयमा आयोजना हुने ‘डा. राममनोहर लोहिया स्मृति व्याख्यान’ कार्यक्रममा सहभागी हुने भएका छन् । यस कार्यक्रममा उनी प्रमुख वक्ताका रूपमा उपस्थित हुनेछन् । उनिसँगै पूर्वमन्त्री हिसिला यमी पनि उक्त कार्यक्रममा सहभागी हुनेछिन् । यो कार्यक्रम डा. भीमराव अम्बेडकरको जन्मजयन्तीको अवसरमा ११ वर्षदेखि लगातार आयोजना हुँदै आएको छ । कार्यक्रम आगामी वैशाख १ गते हुने तालिका छ। भारत भ्रमणका क्रममा वैशाख २ गते भट्टराई साउथ एसियन युनिभर्सिटी, नयाँ दिल्लीमा प्रमुख वक्ताका रूपमा सहभागी हुने सचिवालयले जानकारी दिएको छ । वैशाख २ गते साँझ उनी नेपाल फर्किने तालिका बनाएको छ ।