यस वर्षको डा. सुरेन्द्रभक्त प्रधानाङ्ग पर्यटन पुरस्कार पत्रकार राधा ढुंगानालाई प्रदान

पत्रकार राधा ढुंगानालाई गाउँ पर्यटन प्रवर्द्धनमा महत्वपूर्ण योगदानको लागि डा. सुरेन्द्रभक्त प्रधानाङ्ग पर्यटन पुरस्कार–२०८२ बाट सम्मानित गरिएको छ। यो पुरस्कार गाउँ पर्यटन प्रवर्द्धन मञ्च नेपाल (भिटोफ) को २७औं साधारण सभा तथा १३औं अधिवेशनमा प्रदान गरिएको हो। ढुंगানाले नगद २५ हजार रुपैयाँसहित कदरपत्र प्राप्त गरेकी छन्। राष्ट्रिय सभा अध्यक्ष नारायणप्रसाद दाहाल प्रमुख अतिथिका रूपमा उपस्थित थिए।

२८ चैत, काठमाडौं। पत्रकार राधा ढुंगानालाई डा. सुरेन्द्रभक्त प्रधानाङ्ग पर्यटन पुरस्कार–२०८२ बाट सम्मानित गरिएको छ। गाउँ पर्यटन प्रवर्द्धन मञ्च नेपाल (भिटोफ) को २७औं वार्षिक साधारण सभा तथा १३औं अधिवेशनको अवसरमा उनलाई यो पुरस्कार प्रदान गरिएको हो। गाउँ पर्यटन प्रवर्द्धनमा पत्रकारितामार्फत उल्लेखनीय भूमिका निर्वाह गरेको भन्दै उनलाई पुरस्कृत गरिएको हो।

भिटोफकी निवर्तमान अध्यक्ष शकुन्तला देवकोटाका अनुसार, ग्रामीण तथा होमस्टे पर्यटनलाई राष्ट्रिय बहसको विषय बनाउन सञ्चारमाध्यममार्फत निरन्तर योगदान पुर्याएबापत ढुंगानालाई सम्मान गरिएको हो। गाउँ पर्यटनका अग्रणी अभियन्ता डा. सुरेन्द्रभक्त प्रधानाङ्गको नाममा स्थापना गरिएको उक्त पुरस्कार हरेक दुई वर्षमा यस क्षेत्रमा योगदान गर्ने व्यक्तिलाई प्रदान गरिँदै आएको छ। यस वर्ष ढुंगानाले नगद २५ हजार रुपैयाँसहित कदरपत्र प्राप्त गरेकी छिन्। कार्यक्रममा राष्ट्रिय सभा अध्यक्ष नारायणप्रसाद दाहाल प्रमुख अतिथिका रूपमा उपस्थित थिए। पुरस्कार डा. प्रधानाङ्गले हस्तान्तरण गरेका थिए।

डेढ दशकदेखि पत्रकारितामा सक्रिय ढुंगानाले सोलुखुम्बुको हिमाल एफ.एम.बाट सञ्चार यात्रा सुरु गरेकी थिइन्।