इरान र अमेरिकाबीच पाकिस्तानको इस्लामाबादमा भएको शान्ति वार्ता कुनै निष्कर्षमा नपुगेको अमेरिकी पक्षले जनाएको छ। “हामी यहाँ २१ घण्टादेखि छौँ। तर दुःखद समाचार के छ भने हामी सहमतिमा पुग्न सकेनौँ,” अमेरिकी उपराष्ट्रपति जेडी भान्सले वार्तापछि आयोजित पत्रकार सम्मेलनमा भने।
आफ्नो प्रतिनिधिमण्डलको नेतृत्व गरेका उपराष्ट्रपति भान्सले अमेरिकी वार्ता टोली अब स्वदेश फर्कने जानकारी दिए। उनले संयुक्त राज्य अमेरिकाले आफ्ना “लक्ष्मणरेखाहरू” प्रष्ट पारेको तर इरान ती शर्तहरूमा “सहमत नभएको” उल्लेख गरे। “हामी यी सबै विषयमा कुरा गर्यौं,” भान्सले भनेः “त्यसबाहेकका पनि थुप्रै विषयमा हामीले कुराकानी गर्यौँ।”
“हामी त्यस्तो अवस्थामा पुग्न सकेनौं, जहाँ इरानले हाम्रा शर्तहरू स्वीकार्न सक्थ्यो,” उनले थपे। वार्ताप्रति अमेरिकी नीतिको चर्चा गर्दै भान्सले पत्रकारहरूलाई भनेः “मलाई लाग्छ हामी पूर्ण रूपमा लचिलो थियौँ, हामी निकै मिल्न सक्ने अवस्थामा थियौँ।” उनीहरूले घण्टौँसम्म चलेको क्रममा राष्ट्रपति डोनाल्ड ट्रम्पसँग धेरै पटक कुराकानी गरेको पनि जानकारी दिए।
इरानी विदेश मन्त्रालयका प्रवक्ता इस्माइल बघईले वार्ताहरू “सघन” भए पनि त्यसको “सफलता” अर्को पक्षको “गम्भीरता र आत्मीयतामा निर्भर रहने” बताए। उनीहरूले “अत्यधिक माग र नाजायज आग्रहहरू” नगर्न र इरानका “वैध अधिकार र स्वार्थहरू स्वीकार गर्न” वाशिङ्गटनलाई आग्रह समेत गरे। होर्मुज जलमार्ग, इरानको परमाणु कार्यक्रम, र “इरानमा युद्धको पूर्ण समाप्ति” लगायतका विषयमा छलफल भएको उनले बताए। केही दिनअघि दुई साताका लागि युद्धविराम गर्न सहमत भएका अमेरिका र इरानबीच पाकिस्तानको मध्यस्थतामा शान्ति वार्ता भएको हो।
