अमेरिकी राष्ट्रपति डोनल्ड ट्रम्पले इरानसँगको युद्ध अन्त्य गर्ने उद्देश्यले वार्ता यसै साता पुनः सुरु हुन सक्ने सङ्केत गरेका छन्। इरानसँग गतसाता पाकिस्तानमा भएको वार्ता असफल भएपछि अमेरिकाले इरानी बन्दरगाहहरूमा नाकाबन्दी गरेको थियो। “हामी त्यहाँ (इस्लामाबादमै) बस्नुपर्नेछ। आगामी दुई दिनभित्र केही हुन सक्छ र हामी त्यसका लागि इच्छुक छौँ,” न्यूयोर्क पोस्टसँगको अन्तर्वार्तामा ट्रम्पले बताएका छन्।
अमेरिकी सेनाले नाकाबन्दी सुरु भएको २४ घण्टाभित्र कुनै पनि जहाजले इरानी बन्दरगाहमा आवतजावत नगरेको बताएको अवस्थामा ट्रम्पको उक्त अभिव्यक्ति सार्वजनिक भएको हो। अमेरिका र इरान फेरि आमनेसामने हुँदा आगामी साताबाट सुरु हुने दुई हप्ता लामो युद्धविरामको भविष्यप्रति शंका देखिएको छ। ट्रम्पको भनाइमा इरानी पक्षले कुनै प्रतिक्रिया दिएको छैन। तर संयुक्त राष्ट्रसङ्घका महासचिव एन्टोनियो गुटेरेशले वार्ता पुनः सुरु हुने सम्भावना “उच्च” रहेको बताएका छन्।
इरानमाथि आर्थिक दबाव राख्ने अमेरिकी रणनीतिका अनुसार, पाकिस्तान र इरानका अधिकारीहरूको उद्धृत गर्दै रोयटर्सले जनाएको छ कि वाशिङ्टन र तेहरानका वार्ता टोली यसै साता पाकिस्तान फर्कन सक्नेछन्। तर मिति तय हुन बाँकी छ। वार्ताका लागि कूटनीतिक प्रयास पुनः सुरु हुने आशासँगै मंगलबार विश्व बजारमा कच्चा तेलको मूल्य १०० अमेरिकी डलरभन्दा तल झरेको छ।
अमेरिका र इजरायलले २८ फेब्रुअरीमा इरानमाथि हवाई आक्रमण गरेपछि विश्वको सबैभन्दा महत्वपूर्ण तेल र ग्यास ढुवानी मार्ग होर्मुज स्ट्रेटलाई इरानले लगभग पूर्ण रूपमा बन्द गरिसकेको छ। इस्लामाबादको पहिलो चरण वार्ता असफल भएपछि हाल १२ भन्दा बढी अमेरिकी युद्धपोत र लगभग १०,००० अमेरिकी सैनिकहरूले इरानी बन्दरगाहहरूमा सबै देशका जहाजहरूको नाकाबन्दी गरिरहेका छन्। यो नाकाबन्दी इरानलाई आर्थिक दबावमा राख्नका लागि गरिएको हो।
