३ वैशाख, काठमाडौं। स्वास्थ्य क्षेत्रमा सक्रिय १४ वटा संयुक्त पेशागत संगठनहरूको कडा दबाबपछि सरकारले अस्पताल तथा स्वास्थ्य संस्थाहरूमा साप्ताहिक दुई दिन सार्वजनिक बिदा दिने निर्णय गरेको छ। सरकारको निर्णय अनुसार अब देशभरका सरकारी अस्पतालहरूमा शनिबार र आइतबार नियमित ओपीडी सेवा बन्द रहनेछ। तर, आकस्मिक र इनडोर सेवाहरू भने पहिलेजस्तै २४ घण्टे सञ्चालनमा रहने स्वास्थ्य तथा जनसंख्या मन्त्रालयले जनाएको छ।
स्वास्थ्य मन्त्री निशा मेहता, स्वास्थ्य सचिव डा. विकास देवकोटा र १४ वटा पेशागत संगठनका प्रतिनिधिहरूबीच मन्त्रालयमा भएको छलफलपछि सरकारले यो निर्णयमा लचकता देखाएको हो। मन्त्रालयका स्रोतका अनुसार साप्ताहिक दुई दिन बिदा दिने सहमति भइसकेको छ। ‘स्वास्थ्य मन्त्रालय र पेशागत संगठनबीच भएको सहमतिमा शनिबार र आइतबार बिदा दिने सहमति भएको छ,’ मन्त्रालय स्रोतले भने, ‘मन्त्रालय प्रेस विज्ञप्ति नै निकाल्न लागेको छ। केही समयमा औपचारिक निर्णय सार्वजनिक गरिनेछ।’
दुई दिन ओपीडी सेवा बन्द हुने भएपछि सरकारले आकस्मिक सेवाको क्षमता थप विस्तार गर्ने तयारी गरेको मन्त्रालय स्रोतले जनाएको छ। नेपाल चिकित्सक संघका अध्यक्ष डा. अनिलविक्रम कार्कीको संयोजकत्वमा रहेको दबाब समूहले स्वास्थ्यकर्मीहरूलाई पनि अन्य सरकारी कर्मचारीहरू जस्तै दुई दिन बिदा दिने माग गर्दै आएको थियो। उनीहरूले बढ्दो कार्यभार र मानसिक तनावलाई कारण देखाउँदै आन्दोलनको चेतावनीसमेत दिएका थिए। यसअघि मन्त्रिपरिषद्ले २०७८ चैत्र २२ गते सबै सरकारी कर्मचारीलाई साप्ताहिक दुई दिन बिदा दिने निर्णय गरेको थियो। तर, स्वास्थ्य तथा जनसंख्या मन्त्रालयले अस्पतालहरूमा आइतबार पनि ओपीडी सेवा सञ्चालन गर्न निर्देशन दिएपछि स्वास्थ्यकर्मीहरू असन्तुष्ट भएका थिए। मन्त्रालयको उक्त अडानविरुद्ध स्वास्थ्यकर्मीहरूले संयुक्त आन्दोलनको चेतावनी दिएपछि अन्ततः सरकारले अस्पतालहरूमा पनि दुई दिन बिदा लागू गर्ने निर्णय गरेको हो।
