४ वैशाख, काठमाडौं । संघीय संसदअन्तर्गतका संसदीय समितिहरू पूर्णता पाएका छन्। शुक्रबार १२ वटा संसदीय समितिहरूले सभापति चयन गरेसँगै समितिहरू पूर्ण भएका हुन्। शुक्रबार सम्पन्न निर्वाचनमा १० वटा समितिमा सर्वसम्मत रुपमा सभापति चयन भए भने दुई समितिमा प्रतिस्पर्धात्मक निर्वाचन हुँदैछ।
राज्य व्यवस्था तथा सुशासन समितिको सभापतिमा राष्ट्रिय स्वतन्त्र पार्टीका हरि ढकाल सर्वसम्मत निर्वाचित भएका छन्। कानुन न्याय तथा मानवअधिकार समितिको सभापतिमा राष्ट्रिय स्वतन्त्र पार्टीकी सांसद समीक्षा बास्कोटा सर्वसम्मत निर्वाचित भएकी छन्।
कृषि, सहकारी तथा प्राकृतिक स्रोत समितिको सभापतिमा राष्ट्रिय स्वतन्त्र पार्टीका अशोककुमार चौधरी, पूर्वाधार विकास समितिको सभापतिमा आशिष गजुरेल, महिला तथा सामाजिक मामिला समितिको सभापतिमा आकृति अवस्थी सर्वसम्मत निर्वाचित भएका छन्। संसदीय सुनुवाइ समितिको सभापतिमा बोधनारायण श्रेष्ठ, उद्योग वाणिज्य तथा श्रम तथा उपभोक्ता हित समितिको सभापतिमा रहबर अन्सारी, अन्तर्राष्ट्रिय सम्बन्ध र पर्यटन समितिको सभापतिमा सुम्निमा उदास र अर्थ समितिको सभापतिमा कृष्णहरि बुढाथोकी सबै सर्वसम्मत निर्वाचित भएका छन्।
यस्तै, सार्वजनिक लेखा समितिको सभापतिमा प्रमुख विपक्षी दल नेपाली कांग्रेसका भरत खड्का सर्वसम्मत निर्वाचित भएका छन्। राष्ट्रिय स्वतन्त्र पार्टीको समर्थन पाएपछि खड्का एकल उम्मेदवार भएका थिए। बाँकी दुई समितिहरूमा भने एकभन्दा बढी उम्मेदवारहरू परेका थिए।
राज्य निर्देशक सिद्धान्त, नीति र दायित्व कार्यान्वयन अनुगमन तथा मूल्यांकन समितिको सभापतिका लागि राष्ट्रिय स्वतन्त्र पार्टीका गणेश कार्की र नेपाली कम्युनिष्ट पार्टीका मदन कुमारी शाह (गरिमा) प्रतिस्पर्धामा थिए। राष्ट्रिय स्वतन्त्र पार्टीको स्पष्ट बहुमतका कारण कार्की निर्वाचित भएका छन्।
प्रतिनिधिसभा अन्तर्गतको शिक्षा, स्वास्थ्य तथा सूचना प्रविधि समितिको सभापतिका लागि पनि दुई उम्मेदवार थिए। राष्ट्रिय स्वतन्त्र पार्टीकी ओजस्वी शेरचन तथा नेकपा एमालेका गुरुप्रसाद बराल प्रतिस्पर्धामा थिए। स्पष्ट बहुमतका कारण रास्वपाकी शेरचन निर्वाचित भएकी छन्।
