अमेरिकी सहायक विदेशमन्त्रीको भ्रमण, रविसँग अमेरिका-नेपाल सहकार्यका क्षेत्रबारे छलफल

बालेन्द्र शाह नेतृत्वको नयाँ सरकार गठनपछि अमेरिकी दक्षिण तथा मध्य एसिया मामिला हेर्ने सहायक विदेशमन्त्री समीर पल कपुर काठमाडौं पुगेका छन्। कपुरले सत्तारुढ दल रास्वपाका सभापती रवि लामिछानेसँग भेटघाट गरी अमेरिका र नेपाल बीच सहकार्यका क्षेत्रबारे छलफल गर्नुभएको छ। कपुरले अमेरिकी उद्योग प्रमुखहरूसँग नेपालको सूचना प्रविधि क्षेत्रमा व्यापारिक अवसर विस्तार र डिजिटल पूर्वाधार मजबुत बनाउने विषयमा पनि छलफल गर्नुभएको छ।

कपुर ७ वैशाखमा काठमाडौं आइपुगेका हुन् र बालेन्द्र सरकार बनेपछि नेपाल भ्रमण गर्ने पहिलो उच्च तहका कूटनीतिज्ञ हुनुहुन्छ। नयाँ सरकार र रास्वपाबीचको सम्बन्ध विस्तार गर्ने उद्देश्यले गरिएको यस भ्रमणमा कपुरले सोमबार बिहान सवा ६ बजे त्रिभुवन अन्तर्राष्ट्रिय विमानस्थलमा अवतरण गर्नुभएको थियो। भेटमा उहाँले अमेरिका र नेपाल बीच सहकार्यका क्षेत्रहरूबारे चर्चा गर्नुभएको छ।

कपुरले भने, “काठमाडौंमा भेट्न पाउँदा खुशी लाग्यो। नयाँ सरकारका राष्ट्रिय स्वतन्त्र पार्टीका प्राथमिकताहरू बुझ्ने र अमेरिका–नेपाल सहकार्यका क्षेत्रहरूबारे छलफल गर्ने अवसर प्राप्त भयो।” सहकार्यका कुन-कुन क्षेत्रहरूमा छलफल भएको हो भन्ने कुरा दुवै पक्षले खुलाएका छैनन्। कपुरले सोही दिन दिउँसो अमेरिकी उद्योग प्रमुखहरूसँग नेपालको सूचना प्रविधि क्षेत्रमा अमेरिकी व्यापारिक अवसर विस्तार सम्बन्धमा पनि छलफल गर्नुभएको थियो।

उक्त छलफलमा डिजिटल पूर्वाधार सुदृढ बनाउने, कृत्रिम बुद्धिमत्ताको प्रयोग बढाउने, साइबर सुरक्षा मजबुत बनाउने र अमेरिकी प्राविधिक दक्षताको आदानप्रदान गर्ने उपायहरूबारे कुराकानी गरिएको छ। कपुर तीन दिनको भ्रमणका लागि आएका हुन् र मंगलबार परराष्ट्रमन्त्री र अर्थमन्त्रीसँग भेट गर्नेछन्। प्रधानमन्त्री बालेन्द्र शाहसँगको भेट भने अहिलेसम्म निश्चित छैन। यसअघि बंगलादेशमा पनि नयाँ सरकार बनेपछि कपुरले भ्रमण गरी त्यहाँको द्विपक्षीय सम्बन्धका विषयमा छलफल गर्नुभएको थियो।