पूर्वप्रधानमन्त्री शेरबहादुर देउवा र उनकी पत्नी डा. आरजु राणा देउवाविरुद्ध २४ चैतमा पक्राउ पुर्जी जारी गरिएको छ। तर, पक्राउ पुर्जी जारी भए पनि अहिलेसम्म उनीहरू विरुद्ध इन्टरपोल रेड नोटिस जारी गरिएको छैन। देउवा दम्पती विदेशमा छन् र नेपाल फर्किन बाँकी रहेको जनाइएको छ। ८ वैशाख, काठमाडौं।
पक्राउ पुर्जी जारी भएपनि देउवा दम्पतीलाई नेपाल ल्याउने प्रक्रिया अघि बढाउने तयारी भइरहेको बताइएको छ। यद्यपि, पक्राउ पुर्जी जारी भएको दुई साता बितिसकेको भए पनि रेड नोटिस भने जारी गरिएको छैन। प्रहरी प्रधान कार्यालयले यस सम्बन्धमा कुनै औपचारिक जानकारी सार्वजनिक गरेको छैन। नेपाल प्रहरीका केन्द्रीय प्रवक्ता तथा डिआइजी अविनारायण काफ्ले सो विषय अनुसन्धानअन्तर्गत भएकाले बोल्न नमानेका छन्।
जानकारी रहेका स्रोतका अनुसार अहिलेसम्म देउवा दम्पतीविरुद्ध रेड नोटिसका लागि नेसनल सेन्ट्रल ब्युरो (एनसीबी), काठमाडौंले इन्टरपोललाई औपचारिक पत्राचार गरेको छैन। ‘एउटा पक्राउ पुर्जी मात्रको आधारमा रेड नोटिसका लागि पत्राचार गर्न सकिँदैन। यसका लागि ठोस आधार र कागजी प्रक्रिया पूरा हुनु आवश्यक हुन्छ। त्यो प्रक्रिया अझै बाँकी भएकाले अहिलेसम्म पत्राचार गरिएको छैन,’ स्रोतले बताएका छन्।
पक्राउ पुर्जी जारी हुँदा देउवा दम्पती विदेशमै थिए। उनीहरू चुनावअघि १४ फागुनमा उपचारका लागि सिंगापुर गएका थिए र त्यहाँबाट ७ चैतमा हङकङ पुगेको जनाइएको छ। इन्टरपोलमार्फत रेड नोटिस जारी गर्न प्रहरी प्रधान कार्यालयतिर रहेको नेसनल सेन्ट्रल ब्युरोले अगाडि बढ्नेछ। नोटिस जारी भएमा इन्टरपोलका १९६ सदस्य देशले देउवा दम्पतीलाई पक्राउ गर्न सक्नेछन्।
सम्बन्धित खबर
