सशस्त्र प्रहरी बलले दशरथचन्द नगरपालिका–४ छेलामा अस्थायी मनसुन प्रतिकार्य बेस स्थापना गरेको छ। यस बेसमा सशस्त्र प्रहरी नायब निरीक्षकको नेतृत्वमा १५ जनाको टोली बाढी, पहिरो र आगलागी जस्ता विपद् घटना उद्धारका लागि तयार छ। प्रमुख जिल्ला अधिकारी डाक्टर डिजन भट्टराईले विपद् जोखिम न्यूनीकरणका लागि सबै सरोकारवाला निकायबीच समन्वय आवश्यक रहेको बताए। १० वैशाख, दशरथचन्द (बैतडी) — यहाँ मनसुनको समयमा सम्भावित प्राकृतिक विपद्को जोखिम न्यूनीकरणका उद्देश्यले अस्थायी मनसुन प्रतिकार्य बेस स्थापना गरिएको छ। दशरथचन्द नगरपालिका–४ छेलामा आज उक्त बेसको औपचारिक उद्घाटन गरिएको छ। सशस्त्र प्रहरी बल नम्बर ५१ गुल्म हेडक्वाटर बैतडीका नायब उपरीक्षक जङ्गबहादुर कुँवरले जानकारी दिए अनुसार, विपद्ग्रस्तको राहत तथा उद्धारका लागि यो बेस स्थापना गरिएको हो।
उनले जानकारी दिए कि अस्थायी मनसुन प्रतिकार्य बेसमा सशस्त्र प्रहरी नायब निरीक्षकको नेतृत्वमा १५ जनाको टोली छन्। बाढी, पहिरो, आगलागी लगायत विपद्ग्रस्त व्यक्तिहरुको उद्धारका लागि तालिमप्राप्त जनशक्ति सहित यो बेस स्थापना गरिएको छ। नायब उपरीक्षक कुँवरले भने, ‘मनसुन सक्रिय हुने समय छ। यस अवधिमा हुनसक्ने विपद्ग्रस्तहरुका उद्धारका लागि जनशक्ति र आवश्यक सामग्रीसहित चौबिसै घण्टा तयारी अवस्थामा रहन्छौं। आवश्यक परे तुरुन्त परिचालन हुने व्यवस्था छ।’
प्रमुख जिल्ला अधिकारी डाक्टर डिजन भट्टराईले पनि विपद् जोखिम न्यूनीकरणका लागि प्रभावकारी समन्वय अपरिहार्य रहेको बताएका छन्। सबै सरोकारवाला निकायबीच सहकार्य र समन्वयले मात्र प्रभावकारी कार्यसम्पादन सम्भव रहेको उनको भनाइ छ।
